2
Yesu yuyo dibwe dikalaga siku zose
1 Avo lekeni gose gehile na uvizi na utapitapi na migongo na kuwalonga wayagwe vihile.
2 Muwe kamba wana ving'hele, viwogasulukila matombo, avo na mweye sulukileni matombo ganogile nago zizo mbuli zinogile za Imulungu, ili mudahe kukula muukombola wenu.
3 Kamba vigalonga Maandiko Gang'alile, “Mweye mulanza kamba Mndewa kanoga.”
4 Avo mwize kumwake, heyo yeli dibwe dili gima dilemigwe na wanhu, lakini Imulungu kadisagula na domfaya.
5 Vivija na mweye kamba mabwe magima, mozengwa mng'anda ya kiloho, mosang'hana kamba walava nhosa wang'alile, molava nhosa za kiloho zimnogeza Imulungu kubitila Yesu Kilisito.
6 Kwavija Maandiko Gang'alile golonga,
“Lola nodika dibwe ako Sayuni,
dibwe kulu dinisagule na da kutamaniligwa,
munhu yoyose yomtamanila honda yagwe kinyala.”
7 Avo mweye muditogola difaya ng'hani, lakini kwa waja hawaditogola,
“Dibwe dilemigwe na wazengaji kamba hadifaya,
diwa dibwe kulu kubanza gose.”
8 Na vivija,
“Dibwe diwatenda wanhu waikwale,
na dibwe kulu dowatenda wagwe.”
Oikwala kwavija hawautogole usenga, na vivo viyalondile Imulungu kumwao.
9 Lakini mweye mwa wanhu musaguligwe, walava nhosa wa kindewa na wanhu wa isi ing'alile, wanhu wa Imulungu, ili mupete mbuli za unzonza ziyatendile, kawakema mulawe mdiziza mwize mmulenge wa kukanganya.
10 Baho umwaka hamukalile wanhu wa Imulungu, lakini sambi mwa wanhu zake, umwaka hawonele bazi, lakini sambi kawonela bazi.
Wasang'hanaji wa Imulungu
11 Mbwiga zangu nowapula kamba wabita nzila na wanhu baki hano mwiisi, lekeni kusulukila vihile kwa lukuli ako kugomba siku zose na loho zenu.
12 Mkale goya na wanhu hawamtegeleza Imulungu, hamoja owalonga vihile kamba motenda gehile, wagone gaja ganogile gomsang'hana na wamgwelele ukulu Imulungu mwiisiku ya kwiza kwake.
13 Wategelezeni wanhu weli na ukulu hano mwiisi mbuli ya Mndewa, mtegelezeni yeli mtawala mkulu,
14 na wakulu wa isi, yawasagule wawakoboze wose otenda gehile na wawatogole waja otenda ganogile.
15 Kwavija Imulungu vivo yolonda mweye muwafunge milomo wanhu wabozi kwa kusang'hana ganogile.
16 Kaleni kamba wanhu walekesigwe lakini kulekesigwa kwenu sikukuwe kinhu cha kufisila nzambi zenu. Kaleni kamba wasang'hanaji wa Imulungu.
17 Mtegelezeni kila munhu na wanogeleni waenu wamtogole Yesu na mdumbeni Imulungu na mtegelezeni mkulu wa isi.
Kugaya kamba Kilisito
18 Mweye wasang'hanaji ilaveni kwa wakulu zenu na muwategeleze, siyo waja otenda ganogile na kuwatonga waiyeka, lakini vivija kwa waja owakomhokela.
19 Kwavija Imulungu kowatendela ganogile wanhu ofunga umoyo kwa magayo gowogaya bila kitala chochose kwavija otenda goyolonda heyo.
20 Mopata choni, mwahafunga umoyo mwahatoigwa kwa gehile gamutendile? Lakini kamba mofunga umoyo mna gamagayo mbuli ya kutenda ganogile, Imulungu kowagwaa ganogile.
21 Mbuli ino ayo imukemeligwe, kwavija Kilisito kagaya mbuli yenu na kawalagusila va kutenda, avo kwelelezeni viyatendile.
22 Heyo hatendile nzambi na halongile mbuli yoyose ya uvizi.
23 Viyaligigwe heyo hedike kwa kuliga, viyagaiye halongile mbuli za kuwatenda wadumbe, lakini kamtamanila Imulungu, yeli msemi yanogile.
24 Heyo mwenyego kazipapa nzambi zetu muulukuli lwake mumsalaba, ili tufe kwa nzambi na tuwe wagima kwa ganogile. Kwa kulumizigwa kwake mweye muhonyigwa.
25 Kwavija mweye mukala kamba ng'hondolo wapotele, lakini sambi mumbwelela Msusilaji na Mkalizi wa ugima wenu.