7
1 Mwanangu, zigoge mbuli zangu,
geke goya malagizo gangu.
2 Gakweleleze malagizo gangu na gweye kokuwa mgima,
gakalize mafundizo gangu kamba mwana wa siso jako.
3 Gafunge mvidole vako,
ugandike muumoyo wako.
4 Umulongele ubala, “Gweye kwa lumbu jangu,”
na nzewele, “Gweye kwa mbwigangu.”
5 Vokwika kutali na mtwanzi yehile,
vokwika kutali na mbuli za kutewenza za mtwanzi mgoni.
Mtwanzi mgoni
6 Siku dimoja nisungulila kunze,
mdidilisha da ng'anda yangu,
7 nyona wabwanga wengi mizozolo,
hagati yao mbwanga imoja hagelegeza goya.
8 Ayo kakala yotembela mnzila,
kakala behi na aho hoyokala mtwanzi imoja.
Avo kagoga nzila kachola kuna ing'anda ya mtwanzi ayo.
9 Ikala kipindi cha ichungulo ziza disonga kwingila.
10 Ayo imbwanga kamting'hana ija imtwanzi kavala viwalo va ugoni na kakala na magesa ga uvizi mmoyo wake.
11 Kakala mtwanzi yeli na gubu na mdulu,
magulu gake hagasinya mng'anda yake.
12 Mala kamnzila mala kamdigulilo,
hahunguka mzimbwega mbwega za nzila kopelemba.
13 Kamfagatila mbwanga ayo kamnonela,
na bila kinyala mkihanga kamulongela,
14 “Kumwangu kuna nyama isigala kulawa kuna inhosa indavile,
lelo nigavikiza gaja ganiiduwile.
15 Lekaavo ndawa kukubokela,
nikuzahila ng'hani na nikona.
16 Nhandika lusazi lwangu vinogile,
kwa bulangeti da langi ya kitani kulawa Misili.
17 Nilugela mavumba ga manemane,
udi, na mdalasini.
18 Izo tuiwase mbaka imitondo,
avo tudeng'helele mapenzi.
19 Mkasano wangu kahabule mng'anda kachola mwanza mtali.
20 Kasola mkoba wa sente,
kobwela mbalamwezi ikangale.”
21 Kamtewenza kwa mbuli nyingi za kutewenza,
mbwanga ayo katogola kwa mbuli zake za umulile.
22 Kamuwinza ayo imtwanzi dimwe kwa dimwe,
kamba ng'ombe yochola kuchinjigwa,
kamba mbozi yafungigwe na yochola kukobozigwa.
23 Hatangile kamba ugima wake wa mdizumozumo,
mbaka viyonile kamba kahomigwa msale muumoyo,
kawa kamba ndege yanamate muulwavu.
24 Avo wanangu zitegelezeni,
mbuli zilawa mmulomo wangu.
25 Sambi mutogole kulongozigwa na mtwanzi kamba ayo,
hebu sambi mubite nzila zake.
26 Kwavija kawabwanha wambigalo wengi,
wengi ng'hani yawachinjile.
27 Ng'anda yake nzila ya kuchola kuzimu.
Hanhu ha kuhulumukila mwiifa.