6
Mazumo gayagwe
1 Mwanangu, kamba kuilava kumzamini mbwigako,
na kamba kuilagana na munhu baki,
2 kuifunga kwa mbuli zako mwenyego,
kuigoga kwa lagano jako diutendile mwenyego.
3 Avo, mwanangu tenda vino uikombole,
kwavija kuigela mmakono ga mbwigako,
wahalonda kuikombola genda kwa mbwigako ukaibwanhe na umpule yakulekese.
4 Sikuuleke meso gako gapate utulo,
hebu ng'humbitu zako zikukile.
5 Ikombole kwa kuilava mumtego awo,
ihonye kamba vija kigunga hebu ndege viyomtoloka msakaji.
6 Gweye mnyeke, kawalole muswa,
gelegeza viwokala upate ubala.
7 Kwavija muswa kabule kilongozi,
hebu mkulu, hebu mndewa,
8 lakini koikila ngama ya ndiya kipindi cha zuwa,
koilundiza hamoja ndiya yake kipindi cha kusenga.
9 Gweye mnyeke kowasa aho mbaka lini?
Kolamuka lini muutulo wako?
10 Kolonga, “Leka niwase kidogo, leka nikukile kidogo,
ndeke ng'hunze makono nihumule kidogo.”
11 Kipindi acho ukiwa okuvamila kamba mbokaji,
na kuhungukilwa kokukweleleza kamba munhu mwene mgoha.
12 Munhu yehile, hafaya kinhu,
kokwanga yolonga mbuli za uvizi.
13 Kokonyeza siso na kolava kilaguso kwa magulu,
na kolava kilaguso kwa vidole,
14 kuno kamema gehile mgati ya moyo wake,
kopanga gehile.
Kogala migomvi kila hanhu.
15 Kwa mbuli ayo, gehile gomvika kwa kusinhukiza,
kwa kusinhukiza kobeneka vihile na honda yahone bule.
16 Hana vinhu sita vimgevuza Mndewa Imulungu,
ona saba vimgela ludoko,
17 meso ga kibuli,
lulimi luviza,
makono gokwita damu ilibule kitala,
18 moyo ugesa magesa gehile,
magulu gabuhile kusang'hana gehile,
19 munhu yolava usindila wa uvizi,
na munhu yogala migomvi hagati ha ndugu.
Kuzumwa mbuli ya ugoni
20 Mwanangu goga malagizo ga tatako,
na sikuugaleke mafundizo ga mamako.
21 Siku zose kala nago muumoyo wako,
gafunge mwiisingo yako.
22 Gokulongoza mnzila zako,
gokukaliza kipindi wahawasa,
na gokugwaa magesa kipindi vonda ulamuke.
23 Kwavija malagizo gago, acho kiwenge,
na mafunzo gago, awo mulenge.
Mbuli azo zomzuma na zomfundiza munhu nzila ya ugima.
24 Gokwika kutali na mtwanzi yehile,
gokwika kutali na mbuli za kutewenza za mtwanzi mgoni.
25 Sikuumsulukile mtwanzi ayo kwa kunoga kwake,
na sikuutogole kunamatwa mzing'humbitu za meso gake.
26 Munhu kokwagiza kihande cha gate kwa mtwanzi mgoni,
lakini kwa mwehe wa munhu kokwagiza ugima wake wose.
27 Vino, kodaha kwika moto mhambaga yako abaho viwalo vako sikuvilukule?
28 Vino, kodaha kukanyaga makala ga moto abaho migulu yako sikuilukule?
29 Vivo, vonda yawe mbigalo yonda yawase na mwehe wa miyage,
yoyose yonda yamkwase mtwanzi ayo honda yalekigwe bila kutagusigwa.
30 Munhu yaheba mbuli ya nzala, wanhu odaha kumgombela,
31 lakini yahagogigwa kolondigwa yalihe miyanza saba,
na yalave vinhu vake vose viyeli navo.
32 Munhu yowasa na mwehe wa munhu hagelegeza goya,
kosang'hana mbuli yonda imbanange mwenyego.
33 Kopata vilonda na kubezigwa,
na kinyala chake honda kisemwigwe bule.
34 Kwavija wivu wa mbigalo okuwa mkulu ng'hani,
vonda yambwelezele kokuwa kabule bazi.
35 Honda yatogole malipo gogose,
honda yatogole hata kamba kogweleligwa nhunza nyingi.