5
Kuzumwa mbuli ya ugoni
1 Mwanangu, tegeleza ubala wangu,
tegeleza nzewele zangu nyingi.
2 Vivo vonda udahe kusagula goya,
na mulomo wako ukalize vinhu vuutanga.
3 Mulomo wa mtwanzi mgoni wamulile kamba uki,
na mbuli zake zotelebuka kubanza mavuta,
4 lakini kuuhelelo za usungu kamba sungu,
ng'hali kamba panga dili na makali kuno na kuno.
5 Migulu yake yolozela mwiifa,
hatua zake zolozela kuzimu.
6 Hayona nzila ichola kuugima,
nzila zake za kutanga tanga na hatanga bule.
7 Avo wanangu munitegeleze,
sikumuzisemwe mbuli zilawa mmulomo wangu.
8 Inegeni kutali nzila zenu na heyo,
na sikumukwese behi ya mulango wa ng'anda yake.
9 Sikuuwagwee wayagwe nguvu zako,
na wasede miyaka yako,
10 na wageni sikuwegute mali zako,
na fuguti jako sikudishile mwiing'anda ya munhu iyagwe.
11 Kuuhelelo wa ugima wako kolila kwa usungu,
kipindi nyama na lukuli lwako vonda vilale,
12 baho kolonga, “Habali nigehila mafundizo?
Na ndema kuzumigwa mmoyo wangu?
13 Na siihulike sauti ya wafundiza wangu,
na siwategeleze wanifundize.
14 Sambi na mmabehi kubanangwa,
mumting'hano wa wanhu.”
15 Ing'wa mazi kulawa mkisima chako mwenyego,
mazi gokilima kulawa mkisima chako mwenyego.
16 Habali nzasa zako zipwililike kutali,
na vizanda va mazi mnzila?
17 Viwe vako wiiyeka,
sambi uilumbe na wanhu wayagwe.
18 Nzasa yako inogeligwe,
umdeng'helele mwehe wako wa ubwanga wako.
19 Kanoga na kotembela goya kamba mhala,
matombo gake gakunogeze siku zose,
na gweye unogezwe na unogelo wake.
20 Mwanangu habali kosoligwa na mtwanzi mgoni?
Habali kofagatila matombo ga mtwanzi wa munhu iyagwe?
21 Kwavija nzila za munhu za kuulongozi wa Mndewa Imulungu,
heyo kochona kila kinhu chonda yasang'hane munhu.
22 Gehile ga munhu yehile gomnamata heyo mwenyego,
nzabi za nzambi zake zomfunga heyo mwenyego.
23 Heyo kodanganika kwa kuswela kuzumwa,
na kwa ubozi wake kopotela.