4
Mafunzo ga ubala kulawa kwa tata
1 Wanangu, tegelezeni mafunzo ga tataenu,
tegeni magwiti mupate nzewele.
2 Kwavija nowagwaa malagizo ganogile,
sambi mugaleme mafundizo gangu.
3 Niye vivija ng'hala mwana kwa tatangu,
ng'hala muhole, na mnogelwa wa mamangu.
4 Tatangu kanifunza kino,
“Zigoge mbuli zangu kwa moyo wako wose,
goga malagizo gangu na gweye kokuwa mgima.
5 Bokela ubala bokela nzewele,
sambi uzisemwe hebu kuzileka mbuli zangu.
6 Sambi uuleke ubala nao okwika goya,
uunogele nao okukaliza.
7 Ubala unoga kubanza vinhu vose,
avo upate ubala.
Kwa vinhu vako vose viuli navo upate nzewele.
8 Unogele ng'hani ubala nao okukweza,
ufagatile nao okugwaa nhogolwa.
9 Okuvaza kilemba cha ng'hekewa mdipala jako,
okuvaza taji dinogile.”
10 Mwanangu, tegeleza na kuzibokela mbuli zangu,
ili ukale miyaka mingi.
11 Nikufunza nzila ya ubala,
nikulongoza mwiinzila igoloke.
12 Wahatembela hatuwa zako honda zikimiligwe,
na wahakimbila honda uikwale.
13 Gagoge mafundizo ga nzewele sikuugaleke gakupulusuke,
gagoge kwavija awo ugima wako.
14 Sikuuingize mnzila za wehile,
hebu kukweleleza nzila za wehile.
15 Inege na nzila ayo, sambi ubite behi nayo,
inege kutali uchole.
16 Wanhu wehile hawawasa mbaka wasang'hane gehile,
hawapata utulo mbaka wamgevuze munhu.
17 Kwavija gehile ayo ndiya yao,
usede ayo divai yao.
18 Nzila za wanhu wene haki ziigala na zuwa da imitondo,
viding'ala ng'hani mbaka imisi.
19 Lakini nzila za wehile kamba ziza kulu,
hawakitanga kiwahonzile waikwale.
20 Mwanangu, zitegeleze goya mbuli zangu,
tega magwiti gako utegeleze ulonzi wangu.
21 Sambi uzileke zisegele mgameso gako,
zike muumoyo wako.
22 Kwavija azo awo ugima kwa munhu yeli nazo,
na dawa mulukuli lwake lose.
23 Ulole goya moyo wako kubanza vose viuvilola goya,
kwavija mumo muulawa ugima.
24 Inege kutali na ulonzi wihile,
na mulomo wako sikuulonge mbuli za uvizi.
25 Meso gako galole kuulongozi,
na ng'humbitu zako sikuzibwenze zilole bunhuu kuulongozi.
26 Uigelegeze ng'hani nzila yonda ubite,
na kila honda ukanyage hokuwa hanoga.
27 Sikuuhinduke ukudila hebu ukumoso,
usegese mgulu wako kutali na gehile.