3
Usenga kwa wana
1 Mwanangu, sikuugasemwe mafundizo gangu,
kwa moyo wako ugagoge malagizo gangu.
2 Kwavija zokongezela siku nyingi,
na miyaka ya ugima na tindiwalo.
3 Unogelo hawishaga na kutamanilwa sambi viwe kutali na gweye.
Zifunge msingo yako,
zandike muumoyo wako.
4 Avo kotogoligwa na kugweleligwa nhogolwa kwa Imulungu na iwanhu.
5 Mtamanile Mndewa Imulungu kwa moyo wako wose,
sambi utamanile nzewele zako mwenyego.
6 Umtambule Imulungu mzisang'hano zako,
heyo kozigolosa nzila zako.
7 Sikuuiyone gweye mwenyego kwa mbala,
mdumbe Mndewa Imulungu na uinege na gehile.
8 Ayo yokuwa dawa mulukuli lwako,
na mavuta mmizege yako.
9 Mtegeleze Mndewa Imulungu kwa vinhu vako na vija va ichanduso kusengigwa mmigunda yako yose.
10 Baho makanho gako gomemezigwa,
na viya vako vomema divai ya sambi.
11 Mwanangu sikuubeze kukobozigwa na Mndewa Imulungu,
na sikuugevuzike vonda yakuzume.
12 Kwavija Mndewa Imulungu komzuma ija yomnogela,
kamba tata viyomzuma mwanage iyomnogela.
13 Kamweda munhu ija yopata ubala,
na munhu ija yopata nzewele ng'hani,
14 avo vinoga kubanza shaba,
na vina faida kubanza zahabu.
15 Ubala unoga kubanza mabwe ga bei ng'hulu,
vinhu vose viusulukila haviigala na ubala.
16 Ubala mumkono wake wa kudila kana siku nyingi,
na mumkono wake wa kumoso kuna utajili na kutegelezigwa.
17 Nzila zake zinoga, zose zolozela mditindiwalo.
18 Ubala ajo biki da ugima kwa wose omgoga,
wamweda wanhu wose omgoga.
19 Kwa ubala Mndewa Imulungu kaisimika isi,
kwa nzewele nyingi kawimiza ulanga.
20 Kwa kutanga vinhu vidibo vitulika,
na mawingu galagaza tungwe.
21 Mwanangu, ugogeleze ubala na kusagula goya,
sikuuvileke visegele mgameso gako.
22 Avo vokuwa ugima muumoyo wako,
na dokuwa hambo dinogile mwiisingo yako.
23 Baho kodaha kuchola bila shaka,
na mgulu wako honda uikwale.
24 Wahawasa honda uwase kwa minyagu nyagu, kowasa utulo unogile.
25 Sikuudumbe ng'hondo ya kusinhukiza,
hebu unanzi onda uwavikile awo wehile,
26 kwavija Mndewa Imulungu ajo tamanilo jako,
heyo kokukombola sikuwingile mumtego.
27 Sikuumwime munhu yolonda kutazigwa kuno gweye kodaha kumtaza.
28 Sikuumulongele miyago,
“Genda, mayo ubwele nokugwaa,” na kinhu acho choolonda kodaha kumgwaa lelo.
29 Sikuugelegeze gehile kwa miyago,
yokala behi na gweye na hakonela shaka.
30 Sikuugombe na munhu kamba kuduhu mbuli yoyose,
na munhu ayo hakutendile chochose.
31 Sikuumonele migongo munhu msede,
hebu kwiga nzila zake.
32 Kwavija wehile omgevuza Mndewa Imulungu,
lakini heyo mbwiga wa waja osang'hana ganogile.
33 Mndewa Imulungu koziduwila ng'anda za wehile,
na kozitambikila ng'anda za wene haki.
34 Heyo kowabezeli weli na bezi,
lakini kowagwaa ng'hekewa waja oibwanha hasi.
35 Weli na ubala ohazi kutegelezigwa,
lakini wabozi ogwa kinyala.