2
Nhunza za ubala
1 Mwanangu, wahazitogola mbuli zangu,
na kugagoga malagizo gangu,
2 wahatega gwiti jako kutegeleza ubala,
na kuwika moyo wako upate nzewele ng'hani,
3 wahapula ugweleligwe ubala,
na wahapula ugweleligwe nzewele ng'hani,
4 wahauzahila ubala kamba sente,
na kuulonda kamba mali ifisigwe,
5 baho kotanga choni kumdumba Mndewa Imulungu,
kotambula choni kumtanga Imulungu.
6 Kwavija Mndewa Imulungu kowagwaa wanhu ubala,
mmulomo wake molawa kutanga vinhu na kutanga goya.
7 Kowekila ngama ya ubala waja osang'hana ganogile,
heyo ayo ngao kwa waja otenda kwa moyo kwatu.
8 Kokikaliza kila kinhu kiwosang'hana wanhu otenda haki,
na kuzilola goya nzila za wanhu omtamanila.
9 Wahanitegeleza kotanga nhaguso na haki,
kotanga kusang'hana kamba viilondeka,
na koitanga kila nzila inogile.
10 Kwavija ubala okwingila muumoyo wako,
na kutanga vinhu koinogeza loho yako,
11 kusagula goya kokulola goya,
kuwa na nzewele ng'hani kokukaliza.
12 Yokwika kutali na nzila za gehile,
na wanhu olonga mbuli zihile,
13 na wanhu oleka nzila zigoloke,
ili wachole mnzila za ziza,
14 na wanhu odeng'helela kusang'hana gehile,
na wanhu onogelwa kona gehile gosang'hanwa,
15 na wanhu nzila zao hazigoloke,
na hawatamanilwa bule.
16 Ubala okutenda ukale kutali na mtwanzi mgoni,
mtwanzi mgoni yotongoza.
17 Mtwanzi yomuleka mbigalo wake wa undele wake,
kodibezeli lagano diyatendile kuulongozi wa Imulungu wake.
18 Ng'anda yake yodidimila mwiiifa,
na nzila zake zochola kuzimu.
19 Munhu yoyose yomcholela habule yonda yabwele,
na honda yavike mzinzila zichola muugima.
20 Avo upate kubita nzila ya wanhu wene haki,
na kuzigoga nzila za wang'alile.
21 Kwavija waja obita nzila igoloke opata isi,
na wang'alile ogendelela kukala mgati yake.
22 Lakini wehile osegesigwa mwiisi,
na wanhu osang'hana gehile ong'oligwa.