135
ZABULI YA 135
1 Mgweleleni nhogolwa Mndewa Imulungu.
Digweleleni nhogolwa twaga da Mndewa Imulungu,
mweye wasang'hanaji wa Mndewa Imulungu mgweleleni nhogolwa.
2 Mgweleleni nhogolwa,
mweye msang'hana mng'anda ya Mndewa Imulungu,
mgati muuluwa lwa ng'anda ya Imulungu wetu.
3 Mgweleleni nhogolwa Mndewa Imulungu,
kwavija Mndewa Imulungu kanoga,
dimbileni nhogolwa twaga jake, kwavija donogeza.
4 Mndewa Imulungu kamsagula Yakobo kuwa wake mwenyego,
kamsagula Izilaeli kamba kinhu chake kinogile.
5 Nojuwa kamba Mndewa Imulungu mkulu,
na Mndewa wetu mkulu kubanza imilungu yose.
6 Mndewa Imulungu kotenda chochose kiyolonda,
kuulanga na mwiisi, mwiibahali na mvizanda vose.
7 Heyo kogatenda mawingu gakwele uchanha kulawa kuuhelelo wa isi,
kogala lumwesa hamoja na mvula,
na kodibumiza beho kulawa kukanho jake.
8 Kawakoma wana wa chaudele ako Misili,
wose wana wa chaudele wa wanhu na wanyama.
9 Katenda vilaguso na unzonza kumwako, gweye Misili,
kwa Falao na wasang'hanaji zake wose.
10 Heyo kawatowa wanhu wa isi nyingi,
kawakoma wandewa wakalile na nguvu,
11 kamba vija kwa Sihoni mndewa wa Waamoli,
na Ogu mndewa wa Bashani,
na wandewa wose wa Kanaani.
12 Kazisola isi zao zose na kawagwelela wanhu zake,
kamba uhazi wa wanhu zake wa Izilaeli.
13 Go Mndewa Imulungu, twaga jako dokala milele,
go Mndewa Imulungu, kokumbukigwa ulelo mbaka ulelo,
14 kwavija Mndewa Imulungu kowagombela wanhu zake,
na kowonela bazi wasang'hanaji zake.
15 Vinyago va isi ziyagwe azo shaba na zahabu,
zitendigwe kwa makono ga wanhu.
16 Ina milomo lakini hailonga bule,
na ina meso lakini hailola bule.
17 Ina magwiti lakini haihulika bule,
na haidaha kuhumula.
18 Wose oitenda waigala navo,
na kila imoja yoitamanila.
19 Mweye wanhu wa Izilaeli,
mgweleleni nhogolwa Mndewa Imulungu!
Mweye ulelo wa Haluni,
mgweleleni nhogolwa Mndewa Imulungu.
20 Mweye Walawi,
mgweleleni nhogolwa Mndewa Imulungu,
mweye mumdumba Mndewa Imulungu,
mgweleleni nhogolwa Mndewa Imulungu.
21 Mgweleleni nhogolwa Mndewa Imulungu kulawa Sayuni,
mgweleleni nhogolwa heyo yokala Yelusalemu.
Mgweleleni nhogolwa Mndewa Imulungu.