136
ZABULI YA 136
1 Mshukuluni Mndewa Imulungu kwavija heyo kanoga,
unogelo wake hawishaga okala milele.
2 Mshukuluni Imulungu wa imilungu,
unogelo wake hawishaga okala milele.
3 Mshukuluni Mndewa wa iwandewa,
unogelo wake hawishaga okala milele.
4 Heyo yaiyeka iyo yotenda unzonza mkulu,
unogelo wake hawishaga okala milele.
5 Heyo ayo yalumbile ulanga kwa nzewele zake,
unogelo wake hawishaga okala milele.
6 Heyo ayo yaizengile isi uchanha ya mazi,
unogelo wake hawishaga okala milele.
7 Heyo ayo yalumbile milangaza mikulu,
unogelo wake hawishaga okala milele.
8 Kadilumba zuwa ditawale imisi,
unogelo wake hawishaga okala milele.
9 Kazilumba mbalamwezi na nhondo zitawale ikilo,
unogelo wake hawishaga okala milele.
10 Heyo ayo yawakomile wana chaudele wa Wamisili,
unogelo wake hawishaga okala milele.
11 Heyo ayo yawalavile Waizilaeli hagati yao,
unogelo wake hawishaga okala milele.
12 Katenda avo kwa mkono wake uli na nguvu,
unogelo wake hawishaga okala milele.
13 Heyo ayo yaigolile bahali ya Shamu,
unogelo wake hawishaga okala milele.
14 Kawabitiza Waizilaeli hagati ya bahali,
unogelo wake hawishaga okala milele.
15 Kambwanha Falao hamoja na iwakalizi wake mumo mbahali ya Shamu,
unogelo wake hawishaga okala milele.
16 Heyo ayo yawalongoze wanhu zake kuluwala,
unogelo wake hawishaga okala milele.
17 Heyo ayo yawatowile iwandewa weli na nguvu,
unogelo wake hawishaga okala milele.
18 Heyo ayo yawakomile iwandewa magalu,
unogelo wake hawishaga okala milele.
19 Kamkoma Sihoni mndewa wa Waamoli,
unogelo wake hawishaga okala milele.
20 Kamkoma Ogu mndewa wa Bashani,
unogelo wake hawishaga okala milele.
21 Kaisola isi yao na kawagwaa wanhu zake kamba uhazi wao,
unogelo wake hawishaga okala milele.
22 Uhazi kwa Waizilaeli wasang'hanaji wake,
unogelo wake hawishaga okala milele.
23 Heyo ayo yatukumbuke mkunyunyuwala kwetu,
unogelo wake hawishaga okala milele.
24 Katukombola kulawa kwa iwanhu otwihila,
unogelo wake hawishaga okala milele.
25 Heyo ayo yokigwaa ndiya kila kiumbe kili na ugima,
unogelo wake hawishaga okala milele.
26 Mshukuluni Imulungu yeli kuulanga,
unogelo wake hawishaga okala milele.