138
ZABULI YA 138
(Zabuli ya Daudi.)
Go Mndewa Imulungu, nokushukulu kwa moyo wangu wose,
haulongozi wa imilungu nokwimba nhogolwa zako.
Noidulika mbaka hasi,
kulozela ng'anda yako ing'alile,
nodigwaa nhogolwa twaga jako,
mbuli ya unogelo wako hawishaga na kutamanilwa kwako,
kwavija kudigwaa ukulu twaga jako na mbuli yako,
kubanza vinhu vose.
Siku dija dinikulilile, gweye kunidika,
na kunigangamiza kwa nguvu zako.
 
Wandewa wose wa mwiisi wakugwee nhogolwa gweye Mndewa Imulungu,
kwavija wazihulika mbuli zako ziulongile.
Wembe mbuli ya sang'hano za Mndewa Imulungu,
kwavija ukulu wa Mndewa Imulungu mkulu.
Hamoja Mndewa Imulungu ka uchanha,
komulola goya munhu yabwezigwe hasi,
lakini komtanga munhu yoitapa kulawa kutali.
 
Hata nahabita mmagazo,
gweye koukaliza ugima wangu,
golosa mkono wako kuikimila ng'hasiliki ya iwanhu onihila,
kwa mkono wako wa ukudila unikombole.
Go Mndewa Imulungu, gavikize gaja goulonda kumwangu,
unogelo wako hawishaga okala milele,
sikuuisemwe sang'hano ya makono gako.