139
ZABULI YA 139
(Kwa kilanja, Zabuli ya Daudi.)
1 Go Mndewa Imulungu,
gweye kunilola goya vinili,
kunjuwa mbaka mgati.
2 Gweye kojuwa kukala kwangu na kwinuka kwangu,
gweye kogajuwa magesa gangu kulawa kutali.
3 Gweye kojuwa kutembela kwangu na kuhumula kwangu,
gweye kozijuwa nzila zangu zose.
4 Ning'hali sinalonga mbuli bule,
gweye Mndewa Imulungu kujuwa gose gonilonda kulonga.
5 Kila mwambu wangu kwa baho, kuchugu na kuulongozi,
kunikila mkono wako kunikaliza.
6 Maalifa gako kobanza nzewele zangu,
makulu ng'hani sidaha kugajuwa.
7 Nikimbilile kwahi niinege na loho yako?
Nichole kwahi nikikimbile kihanga chako?
8 Kamba nahakwela uchanha kuulanga,
gweye kwa uko,
nahachola kuzimu gweye vivija kwa uko.
9 Nahaguluka mbaka uhelelo wa mwambu wa kudilawila zuwa,
hebu nahakala kuuhelelo wa bahali,
10 vivija kuko gweye kwa uko konilongoza,
mkono wako wa ukudila onigoga goya.
11 Kamba nahapulile ziza dinigubike,
mulenge unimwemweselaga uwe ziza,
12 kumwako kuduhu ziza,
ikilo yong'ala kamba imisi,
kumwako ziza kamba mulenge.
13 Kwavija gweye iyo ulumbile mgati yangu,
kunilumba mwiinda ya mamangu.
14 Nokushukulu kwavija kunilumba kwa unzonza mkulu na kudumbiza.
Sang'hano zako za unzonza,
mbuli ayo noijuwa goya.
15 Lukuli lwangu lwabule kifiso kumwako,
nilumbigwa hanhu hakifiso,
nilumbigwa kwa ufundi mwiinda ya mamangu.
16 Meso gako gawona lukuli lwangu lung'hali halunakwisha,
na kwandika kila kinhu mkitabu chako,
siku zangu zose kuzipanga,
hata siku ya ichanduso hainakuwa.
17 Go Imulungu, magesa gako ganoga ng'hani kumwangu,
na magesa gako hagadahika kupetigwa!
18 Kamba nahagapetile mengi kubanza msanga.
Nahalamuka ning'hali na hamoja na gweye.
19 Go Imulungu, maza uhawakomile awo otenda gehile!
Segeleni kumwangu mweye mwitaga damu!
20 Okulonga vihile akuno ogelegeza gehile,
iwanhu okwihila oditambula bule twaga jako.
21 Go Mndewa Imulungu, sikuniwehile awo okwihila gweye?
Sikuniwehile ng'hani awo okulema gweye?
22 Wanhu okwihila gweye na niye nowehila,
nowehila ng'hani.
23 Go Imulungu, unilolese, ujuwe moyo wangu,
unigeze, ugajuwe magesa gangu.
24 Ulole kamba mgati yangu kuna nzila ikugevuza,
unilongoze mwiinzila ikalaga milele.