140
ZABULI YA 140
(Kwa kilanja, Zabuli ya Daudi.)
1 Go Mndewa Imulungu, ung'hombole na wanhu wehile,
unikalize na wanhu wasede,
2 awo opanga gehile mmizoyo yao,
oding'hula ndwagi siku zose.
3 Milimi yao oitenda mikali kamba zoka,
sumu ya futa ya mmilomo yao.
4 Go Mndewa Imulungu, unihonye na makono ga wanhu wehile,
unikimile na wanhu wasede,
wapangile kunigwisa.
5 Weli na kibuli wanitegela mitego kwa kifiso,
na wanzanza nzabi za lwavu lwao,
wanikila mitego mwiinzila yangu.
6 Go Mndewa Imulungu, nokulongela, “Gweye iyo Imulungu wangu.”
Go Mndewa, uhulike kililo changu na unyonele bazi.
7 Go Mndewa Imulungu, Mndewa wangu, mkombola wangu mwene nguvu,
kunikaliza kipindi chose cha ng'hondo.
8 Go Mndewa Imulungu, sikuuwagwelele iwanhu wehile gaja gowosulukila,
na sikuuivikize mipango yao,
buleavo oitapa.
9 Mapala ga awo onizunguluka gagubikwe,
na magazo golawa mmilomo yao.
10 Makala ga moto gawalagalile,
wasigwe muumoto mdisimo,
na sikuwenuke kabili.
11 Awo owadeta wayao sikuwamwede mwiisi,
gehile gawasake wanhu wasede.
12 Nojuwa kamba Mndewa Imulungu kowagombela wakiwa,
na kowagwaa haki ngaengae.
13 Kweli wene haki odigwaa nhogolwa twaga jako,
na waja watelele okala kumwako.