145
ZABULI YA 145
(Lwila lwa nhogolwa lwa Daudi.)
1 Nokugwaa nhogolwa, gweye Imulungu wangu na Mndewa,
nodigwaa nhogolwa twaga jako siku zose na milele.
2 Siku zose nokugwaa nhogolwa,
nodigwaa nhogolwa twaga jako siku zose na milele.
3 Mndewa Imulungu mkulu, na kofaya kutogoligwa,
ukulu wake haupimigwa.
4 Ulelo mbaka ulelo ozisimulila sang'hano zako,
wanhu olonga sang'hano zako ng'hulu.
5 Olonga mbuli za ukulu wako,
na niye nozigelegeza sang'hano zako za unzonza.
6 Wanhu olonga mbuli zako za kudumbiza,
na niye nosimulila ukulu wako.
7 Osimulila wema wako mkulu,
na okwimba kwa deng'ho mbuli ya haki yako.
8 Mndewa Imulungu kamema bazi na kana moyo unogile,
hagevuzika hima hima, heyo kamema unogelo hawishaga.
9 Mndewa Imulungu kanoga kwa wanhu wose,
kana bazi kwa viumbe vake vose.
10 Go Mndewa Imulungu, vose vuulumbile vokugwaa nhogolwa,
na wanhu wako otamaniligwa okutambikila.
11 Osimulila ukulu wa undewa wako,
na olonga udahi wako,
12 ili wanhu wose wajuwe sang'hano zako ng'hulu,
na ukulu wa ukunoga wa undewa wako.
13 Undewa wako awo undewa ukala milele.
Utawala wako okala ulelo mbaka ulelo.
Mndewa Imulungu kotenda gose gayalongile,
na kana bazi kwa sang'hano zake zose.
14 Mndewa Imulungu kowenula waja ogwa,
na kowenula waja ohumwa na mizigo yao.
15 Wose meso gao okulola gweye,
na gweye kowagwaa ndiya yao mkipindi kilondeka.
16 Kokunzula kiganza chako,
kokigutiza kila kiumbe kili na ugima.
17 Mndewa Imulungu kana haki mnzila zake zose,
na kotamaniligwa na viumbe vake vose.
18 Mndewa Imulungu kabehi na wose omkema,
kabehi na wose omkema kwa kweli.
19 Kowagwaa gaja gowolonda awo omdumba,
heyo kohulika kililo chao na kowakombola.
20 Mndewa Imulungu kowakaliza wose omnogela,
lakini kowabananga wose otenda gehile.
21 Mulomo wangu osimulila nhogolwa za Mndewa Imulungu,
viumbe vose vidigwee nhogolwa twaga jake ding'alile siku zose na milele.