146
ZABULI YA 146
1 Mtogoleni Mndewa Imulungu!
Loho yangu mtogole Mndewa Imulungu,
2 Nomgwaa nhogolwa Mndewa Imulungu muugima wangu wose,
nomwimbila nhogolwa Imulungu wangu siku zose vinikala mgima.
3 Sikuwike tamanilo jako kwa iwakulu,
kwa iwanhu odanganika,
hewo hawadaha kumkombola munhu.
4 Mhumuzi yahalawa obwela mditimbwisi,
siku didijo mipango yao yofa.
5 Kamweda munhu ija yotazigwa na Imulungu wa Yakobo,
tamanilo jake da kwa Mndewa Imulungu, Imulungu wake,
6 Heyo yalumbile ulanga na isi,
bahali na vose vili mumo.
Heyo yotamaniligwa milele.
7 Heyo kowagwaa haki waja okoneligwa,
na kowagwaa ndiya weli na nzala.
Mndewa Imulungu kowalekesa waja wafungigwe.
8 Mndewa Imulungu kowafumbula meso wasuwameso,
Mndewa Imulungu kowenula waja olemelwa na mizigo yao,
Mndewa Imulungu kowanogela wene haki.
9 Mndewa Imulungu kowakaliza wanhu baki,
kowataza wana wakiwa na wagane,
lakini kozibananga nzila za wanhu wehile.
10 Mndewa Imulungu kotawala milele,
Imulungu wako, gweye Sayuni,
kotawala ulelo mbaka ulelo.
Mtogoleni Mndewa Imulungu.