147
ZABULI YA 147
1 Mtogoleni Mndewa Imulungu.
Vinoga kumgwaa nhogolwa Imulungu wetu,
kwavija yonogeza na vivo ilondigwa kumwimbila nhogolwa heyo.
2 Mndewa Imulungu kodizenga kabili buga da Yelusalemu,
kowabweza Waizilaeli wagaligwe kuuhamizo.
3 Kowahonya wahondigwe mizoyo,
na kovifunga vilonda vao.
4 Kopanga nhondo zokuwa nyingahi,
na kozigwaa kila imoja twaga jake.
5 Mndewa wetu mkulu na kana udahi ng'hani,
nzewele zake hazidahika kupimigwa.
6 Mndewa Imulungu kowenula wahole,
lakini kowabwanha hasi mditimbwisi wanhu wehile.
7 Mwimbileni Mndewa Imulungu nyila za kumgwaa nhogolwa,
mtoweleni bango Imulungu wetu.
8 Heyo kougubika ulanga kwa mingu,
koitowela mvula isi,
na koteza minoga kuvigongo.
9 Kowagwaa wanyama ndiya yao,
na kogadima makinda ga bondwa gahalila.
10 Heyo halonda nguvu za falasi,
na hanogelwa na nguvu za wakalizi,
11 lakini konogezwa na wanhu omdumba,
wanhu otamanila unogelo wake hawishaga.
12 Gweye Yelusalemu, mtogole Mndewa Imulungu,
gweye Sayuni, mtogole Imulungu wako.
13 Kwavija heyo kaigangamiza mhalalingwe ya mulango wako,
na kowatendela ganogile wanhu weli mgati yako.
14 Kokugwaa tindiwalo mzimbaka zako,
kokutenda ushibe kwa ngano inogile.
15 Heyo kogala lagizo jake mwiisi,
na mbuli yake yokimbila hima hima.
16 Kokwanzanza seluji kamba mgolole wa sufi,
kodipwililisa tungwe kamba tozi.
17 Kogala mvula ya mabwe kamba msele,
kuduhu munhu yodaha kwima mbuli ya beho jake.
18 Koituma mbuli yake navo volumbuka,
kogala beho jake na mazi gokilima.
19 Komulongela Yakobo mbuli yake,
malagizo gake na mafundizo gake kwa Izilaeli.
20 Hanatenda vivo kwa wanhu wa isi yoyose iyagwe,
hewo hawagajuwile malagizo gake.
Mtogoleni Mndewa Imulungu.