148
ZABULI YA 148
1 Mtogoleni Mndewa Imulungu.
Mtogoleni Mndewa Imulungu kulawa kuulanga,
mtogoleni kuko kuyeli uchanha.
2 Mtogoleni heyo, mweye wasenga zake wose wa kuulanga,
mtogoleni heyo, mweye wakalizi wose wa kuulanga.
3 Mtogoleni heyo, mweye zuwa na mbalamwezi,
mtogoleni heyo, mweye nhondo zose zing'ala.
4 Mtogoleni heyo, mweye ulanga wa uchanha ng'hani,
na mweye mazi geli uchanha ya ulanga.
5 Vose viditogole twaga da Mndewa Imulungu,
kwavija heyo kalagiza na vose vilumbigwa.
6 Heyo kavika hanhu hao siku zose na milele,
kalava lagizo hadibenigwa bule.
7 Mtogoleni Mndewa Imulungu kulawa mwiisi,
mweye viumbe vikulu vili mbahali na vidibo va bahali,
8 mimwesa na mvula ya mabwe, seluji na kungugu,
na kukuzumbi vose vovikiza mbuli yako.
9 Mtogoleni heyo, mweye migongo na vigongo vose,
mibiki ya matunda na mielezi yose.
10 Mtogoleni heyo, mweye wanyama wa kumuhulo na ofugigwa,
na wang'onyo otambala na ndege oguluka.
11 Mtogoleni heyo, mweye wandewa wa isi yose,
na wakulu na watawala wa mwiisi.
12 Mtogoleni heyo, mweye wabwanga na wandele,
wavele na wana.
13 Wose waditogole twaga da Mndewa Imulungu,
kwavija twaga jake diiyeka dijo kulu,
ukulu wake wa uchanha ya isi na ulanga.
14 Heyo kawagwaa wanhu zake nguvu,
na nhogolwa kwa wanhu zake wose otamaniligwa,
wanhu wa Izilaeli weli behi na moyo wake.
Mtogoleni Mndewa Imulungu.