18
ZABULI YA 18
(Zabuli ya Daudi iyamwimbile Mndewa Imulungu mbuli ya kipindi viyakomboligwe kulawa mmakono ga Sauli na wanhu wayagwe omwihila.)
1 Nokunogela gweye Mndewa Imulungu, nguvu yangu.
2 Mndewa Imulungu ayo dibwe jangu,
na ngome yangu na mkombola wangu,
Imulungu wangu na dibwe jangu dinikimbilile,
na ngao ya ukombola wangu na ngome yangu.
3 Nomkema Mndewa Imulungu yolondigwa kutogoligwa,
kanikombola kulawa kwa iwanhu onihila.
4 Nzabi za ifa zinizunguluka,
ng'humbi ingubika.
5 Nzabi za kuzimu zinizingiliza,
mitego ya ifa ingoga.
6 Mmagazo gangu nimkema Mndewa Imulungu,
nimulilila Imulungu wangu yanitaze.
Kulawa mng'anda yake kahulika sauti yangu,
na kililo changu kimvikila mmagwiti gake.
7 Aho isi igwaya na kutigisika,
imigimbo ya vigongo igwaya,
kwavija Imulungu kagevuzika.
8 Yosi difililika kulawa mmhula zake,
moto usakaza ulawa mmulomo wake,
makala ga moto gazipuka kulawa kumwake.
9 Katula ulanga kahumuluka hasi,
mawingu matitu gakala hasi ya magulu gake.
10 Kakwela kiumbe kili na mabawa kaguluka,
kahumuluka mdibeho kamba ndege.
11 Kaigubika ziza kila mwambu,
mawingu gazamile gamemile mazi gamzunguluka.
12 Kwa mng'alo wake mawingu gasegela,
itowa mvula ya mabwe na mimwesa.
13 Mndewa Imulungu kaduma kulawa kuulanga,
heyo yeli Uchanha Ng'hani kalava sauti yake,
mvula ya mabwe na mabwe gokwaka moto vilagala.
14 Katowa misale yake kawaswaswanya iwanhu omwihila,
kagala mimwesa kawawinga.
15 Abaho hasi kuna ibahali koneka,
ichandusilo cha isi kigubuka,
gweye Mndewa Imulungu vuukomhoke,
kwa ukubuma kwa mhumuzi ya mhula yako.
16 Imulungu kagolosa mkono wake kulawa uchanha kangoga,
kanivabula kulawa mmazi mengi.
17 Kanikombola kulawa kwa wanhu onihila weli na nguvu,
na kanihonya kulawa kwa awo onihila,
kwavija wakala na nguvu kubanza niye.
18 Wanivamila ving'halile mmagazo,
lakini Mndewa Imulungu kanitaza.
19 Kanigala hanhu hana inyafasi,
kanikombola kwavija kaninogela.
20 Mndewa Imulungu kanhendela kamba haki yangu viili,
kanhunza kwavija makono gangu gabule ubananzi,
21 kwavija niikweleleza nzila ya Mndewa Imulungu,
na sitendile gehile na kumuleka Imulungu wangu.
22 Kwavija malagizo gake gose nigagoga,
na mafundizo gake sigalekile.
23 Na niye nitelela kuulongozi wake,
niigomesa sikunitende nzambi.
24 Avo Mndewa Imulungu kanitunza kamba vinitendile,
kanhunza kwavija makono gangu gabule ubananzi.
25 Gweye kotamaniligwa kwa wanhu otamaniligwa,
kwa yelibule kitala koilagusa kwabule kitala.
26 Gweye kung'ala kwa waja wang'alile,
lakini kwa wanhu otenda gehile kolagusa usede.
27 Gweye kowakombola iwanhu wahole,
lakini kowahumulusa iwanhu oitapa.
28 Kwavija gweye koibwinha taa yangu,
Mndewa Imulungu konimwemwesela mdiziza.
29 Gweye wahanitaza nodihuma bumbila da wakalizi,
kwa Imulungu wangu nodaha kuzumha luwa.
30 Sang'hano za Imulungu zitelela,
imbuli ya Mndewa Imulungu ya kweli,
heyo ayo ngao kwa iwanhu wose omkimbilila.
31 Haduhu yeli Imulungu ila Mndewa Imulungu,
haduhu yeli dibwe ila Imulungu wetu.
32 Imulungu ayo yanigwelele nguvu,
na kaitenda nzila yangu itelele.
33 Kaigangamiza migulu yangu sikuitelebuke kamba ya nhelembo,
kanika goya uchanha kunhembeti.
34 Kogafunza makono gangu kuitowa ng'hondo,
makono gangu gana nguvu ya kuvedula upinde uli na nguvu.
35 Kunigwaa ngao yako ya kunikombola,
mkono wako wa ukudila unigoga,
ukunoga kwako unitenda mkulu.
36 Kuitanula nzila yangu,
na migulu yangu haitelebuke bule.
37 Niwakweleleza iwanhu onihila na niwagoga,
sibwelile kuchugu mbaka vuwabanangigwe wose.
38 Niwabwanha hasi na hawadahile kwinuka kabili,
wagwa hasi ya magulu gangu.
39 Gweye kunigwaa nguvu ya kuitowa kung'hondo.
Kuwabwanha hasi yangu iwanhu onilema.
40 Kuwatenda iwanhu onihila wakimbile,
na awo onilema niye niwabananga.
41 Waguta mizangi lakini hakala haduhu munhu yoyose wa kuwataza,
wamulilila Mndewa Imulungu,
lakini heyo hawedike bule.
42 Niwahonda wagaluka kamba timbwisi vidihembeluswa na beho,
niwabojoga kamba tope da mnzila.
43 Gweye kunikombola kulawa kwa iwanhu wanivamile,
kunitenda niwe mtawala wa isi zose,
iwanhu siwajuwile wanisang'hanila.
44 Wanhu baki weza kumwangu kuno onifugamila,
bahaja viwahulike nolonga wanitegeleza.
45 Wageni wakala wabule tamanilo,
weza kumwangu kulawa mzingome zao akuno ogwaya.
46 Mndewa Imulungu kamgima!
Yatogoligwe dibwe jangu!
Yatogoligwe Imulungu wa ukombola wangu!
47 Imulungu ayo yanidahize kuwalihiza gehile,
na kaweka hasi yangu iwanhu wa isi zose.
48 Kanikombola kulawa kwa iwanhu onihila,
kaninula uchanha ya awo onilema niye,
na kanigala kutali ya iwanhu iwasede.
49 Kwa mbuli ayo, nokutogola gweye Mndewa Imulungu hagati ya iwanhu wa isi zose,
na nokwimba na kulonga twaga jako kulu.
50 Imulungu kamgwaa mndewa wake mhumo ng'hulu,
kalagusa unogelo wake hawishaga kwa ayo iyamsagule,
kwa Daudi na ulelo wake milele.