19
ZABULI YA 19
(Kwa kilanja, Zabuli ya Daudi.)
1 Ulanga olonga ukulu wa Imulungu,
na langa da uchanha dosimulila sang'hano ya makono gake.
2 Imisi yolonga na imisi iyagwe,
ikilo yosimulila na ikilo kiyagwe.
3 Haduhu kulonga hebu ulonzi,
sauti yao haihulikwa,
4 ila, sauti yao yenela mwiisi yose,
na mbuli zao zovika mbaka kuihelela isi yose.
Imulungu kadikila zuwa ukazi wake ako kuulanga,
5 dolawa kamba mbigalo yodeng'helela kupata mwehe,
dodeng'ha kamba imunhu galu viyoitanda kukimbila.
6 Dosomoka kulawa kuuhelela ulanga,
na dozunguluka mbaka mwambu uyagwe,
haduhu kinhu kidaha kuifisa na vuke jake.
7 Malagizo ga Mndewa Imulungu gatelela,
goideng'heza loho,
Amuli za Mndewa Imulungu za ukweli,
zomgwaa ubala imunhu yauswelile.
8 Nzila za Mndewa Imulungu zinoga,
zoudeng'heza moyo,
lagizo da Mndewa Imulungu ding'ala,
dogamwemwesela meso.
9 Kumdumba Mndewa Imulungu kunoga,
kokala milele.
Malagizo ga Mndewa Imulungu ga kweli
na gose gana haki.
10 Ago ga kusulukila kubanza zahabu,
na kubanza zahabu ing'ala ng'hani.
Gamulile kubanza uki,
kubanza uki unogile.
11 Msang'hanaji wako kozumwa kwa gago,
munhu yahagagoga kopata nhunza ng'hulu.
12 Nani yodaha kugona gehile gake mwenyego?
Gagele kumgongo gehile gangu sigajuwile.
13 Unikalize niye msang'hanaji wako na nzambi zitendagwa giladi,
sikuutogole gago ganitawale!
Aho nokuwa ning'ala na nokuwa nabule kitala kikulu.
14 Leka mbuli za mulomo wangu na magesa ga nzewele zangu,
gatogoligwe kuulongozi wako gweye Mndewa Imulungu,
dibwe jangu na mkombola wangu!