21
ZABULI YA 21
(Kwa kilanja, Zabuli ya Daudi.)
1 Go Mndewa Imulungu,
mndewa kodeng'helela kwa nguvu zako,
kodeng'helela ng'hani kwavija kumkombola.
2 Kumgwelela gaja goyolonda mmoyo wake,
na hugalemile gaja gayapulile kwa mulomo wake.
3 Kumwizila na kumgwaa gaja ganogile,
kumvaza taji ya zahabu inogile kupala jake.
4 Kakupula ugima na gweye kumgwaa,
kumtenda yakale siku nyingi siku zose na milele.
5 Kapata ukulu kubitila ukombola wako,
gweye kumgwelela ukulu na nhogolwa.
6 Kwavija kumtenda yamwede milele,
komtenda yadeng'he kwavija gweye kwa hamoja na heyo.
7 Kwavija mndewa komtamanila Mndewa Imulungu,
na kubitila unogelo hawishaga wa ayo yeli uchanha ng'hani honda yasegesigwe.
8 Mkono wako owazahila iwanhu okwihila,
mkono wako wa ukudila owazahila iwanhu wose okulema.
9 Wahalawila kowabananga kamba tanuli da moto.
Mndewa Imulungu kowameza mna ing'hasiliki yake,
na moto owasakaza.
10 Kowabananga iwanhu wa ulelo wao kulawa mwiisi,
na iwana wa hewo kulawa kwa iwanhu.
11 Wahalonda kukutendela gehile,
kwa kugelegeza gehile olemelwa.
12 Kwavija kowaswaswanya na kowatenda wakimbile,
kwa upinde wako uuvutile.
13 Utogoligwe gweye Mndewa Imulungu, mbuli ya nguvu zako.
Siye tokwimba na kuutogola udahi wako.