24
ZABULI YA 24
(Zabuli ya Daudi.)
1 Isi na vose vili mumo vake Mndewa Imulungu,
isi yose na wose okala mumo vake heyo.
2 Kwavija heyo keka chandusilo chake uchanha ya bahali,
kasimika chandusilo uchanha ya mizanda ya mazi.
3 Nani yonda yakwele kulugongo lwa Mndewa Imulungu?
Nani yonda yakale mng'anda yake ing'ala?
4 Imunhu yeli na makono mazelu na moyo mzelu,
imunhu havizaga,
na imunhu haiduwila kwa uvizi.
5 Munhu ayo kobokela ganogile kulawa kwa Mndewa Imulungu,
na haki kulawa kwa Imulungu mkombola wake.
6 Uno awo ulelo wa iwanhu omkweleleza heyo,
iwanhu ozahila kihanga chako, gweye Imulungu wa Yakobo.
7 Vugukeni mweye milango,
vugukeni mweye milango ya umwaka,
ili Mndewa yeli na udahi wose yengile.
8 Nani ayo Mndewa yeli na udahi wose?
Ayo Mndewa Imulungu, yeli na nguvu na mdaha gose,
heyo ayo Mndewa Imulungu, hahumwaga kung'hondo.
9 Vugukeni mweye milango,
vugukeni mweye milango ya umwaka,
ili Mndewa yeli na udahi wose yengile.
10 Nani ayo Mndewa yeli na udahi wose?
Ayo Mndewa Imulungu, Imulungu wa ukulu,
heyo ayo Mndewa Imulungu yeli na udahi wose.