25
ZABULI YA 25
(Zabuli ya Daudi.)
1 Mndewa Imulungu, kumwako noika loho yangu.
2 Mndewa Imulungu, kumwako notamanila,
sikuunhende nyone kinyala,
sikuuwatende awo onihila waniseke nahahumwa.
3 Sikuumuleke imunhu yokutamanila yakone kinyala,
ila wagwe kinyala wose okulema gweye giladi.
4 Unongele nzila zako, gweye Mndewa Imulungu,
unifunze ago goulonda.
5 Unilongoze mna ikweli yako na unifunze,
kwavija gweye ayo Imulungu mkombola wangu,
nokutamanila gweye kila siku.
6 Kumbuka bazi jako gweye Mndewa Imulungu,
kumbuka unogelo wako hawishaga,
kwavija avo kunavo tangu mwaka.
7 Sikuuzikumbuke nzambi na gehile ga ubwanga wangu,
unikumbuke kamba unogelo wako hawishaga viwili,
kwavija gweye Mndewa Imulungu kunoga.
8 Mndewa Imulungu kanoga na katelela,
avo kowafunza wene nzambi nzila zake.
9 Kowalongoza wahole mzimbuli zinogile,
na kowafunza wahole nzila zake.
10 Mndewa Imulungu, kotenda kwa unogelo wake hawishaga na kutamanilwa,
kwa awo ogoga lagano jake na amuli zake.
11 Mbuli ya twaga jako, gweye Mndewa Imulungu,
ugele kumgongo nzambi yangu ino kwavija ng'hulu.
12 Kila munhu yomdumba Mndewa Imulungu,
Mndewa Imulungu komulagusila nzila ya kubita.
13 Munhu kamba ayo komweda siku zose,
na ulelo wake oihazi isi.
14 Mndewa Imulungu mbwiga wa awo omdumba,
heyo kowakumbusa lagano jake.
15 Nomulola Mndewa Imulungu siku zose,
heyo koilava migulu yangu mumtego.
16 Mndewa Imulungu, unilole na unyonele bazi,
kwavija niye namkiwa na nogaya.
17 Unisegesele magazo ga mmoyo wangu,
unisegese mmadununzo.
18 Ugalole magazo gangu na madununzo gangu,
uzigele kumgongo nzambi zangu zose.
19 Lola iwanhu onihila viwali wengi,
lola viwonihila kwa usede.
20 Uulole goya ugima wangu, unikombole nokukimbilila gweye,
nokimbilila ukalizi wako,
sikuutogole nigwe kinyala.
21 Ganogile na haki vinikalize,
kwavija nokutamanila gweye.
22 Imulungu, uwakombole wanhu wako wa Izilaeli,
uwakombole kulawa mmagazo gao gose.