27
ZABULI YA 27
(Zabuli ya Daudi.)
1 Mndewa Imulungu ayo mulenge wangu,
na ukombola wangu,
niye nimdumbe nani?
Mndewa Imulungu ayo ngome ya ugima wangu,
simdumba munhu yoyose.
2 Wanhu wehile wahanivamila ili wanikome,
awo iwanhu onihila oikwala na kugwa.
3 Hata wakalizi wahanizunguluka,
moyo wangu haudumba kinhu,
hata nahengila mna ing'hondo,
ning'hali nokutamanila gweye.
4 Mbuli imoja nimpula Mndewa Imulungu,
na mbuli ayo noilonda ng'hani,
nikale mng'anda ya Mndewa Imulungu,
siku zose za ugima wangu,
nilole ukunoga kwa Mndewa Imulungu,
na nizahile ulongozi wake mng'anda yake.
5 Siku ya magazo konifisa mkibanda chake,
konifisa mdihema jake,
na konika uchanha mdibwe.
6 Na niye kwa deng'ho nowalola iwanhu onihila onizunguluka.
Nomulavila nhosa kwa deng'ho mng'anda yake,
nomwimbila na kumdeng'helela Mndewa Imulungu.
7 Utegeleze gweye Mndewa Imulungu, nokulilila,
unyonele bazi na unidike.
8 Moyo wangu onilongela, “Izo umkweleleze Imulungu!”
Avo nokwiza kumwako gweye Mndewa Imulungu.
9 Sikuuleke kunilola kwa bazi.
Sikuundeme kwa ng'hasiliki yako niye msang'hanaji wako,
gweye ayo unitaza siku zose.
Sikuunitupe wala kundeka, Imulungu Mkombola wangu.
10 Hata kamba tatangu na mamangu wahanyasa,
Mndewa Imulungu konibokela kumwake.
11 Unifunze nzila zako gweye Mndewa Imulungu,
unilongoze mnzila igoloke,
mbuli ya iwanhu onihila.
12 Sikuundeke iwanhu onihila wanitende viwolonda,
kwavija iwanhu osindila uvizi wanikweleleza,
na hewo onikomhokela kwa usede.
13 Nojuwa nogona ganogile ga Mndewa Imulungu,
mna ikae ya iwanhu wagima.
14 Mtamanile Mndewa Imulungu,
wamba, ufunye umoyo,
mbete Mndewa Imulungu!