31
ZABULI YA 31
(Kwa kilanja, Zabuli ya Daudi.)
1 Kumwako gweye Mndewa Imulungu, nokimbilila,
sikuundeke ng'o nigwe kinyala,
kwa haki yako unikombole.
2 Unihulike na unikombole sambi baha,
uwe kumwangu kamba dibwe da kukimbilila,
ngome ya kunikombola.
3 Kwavija gweye ayo dibwe jangu na ngome yangu.
Mbuli ya twaga jako unilongoze na undole goya.
4 Kunilava mna ulwavu wanitegele,
kwavija gweye ayo kimbililo da ugima wangu.
5 Mmakono gako noika loho yangu,
kunikombola, gweye Mndewa Imulungu, Imulungu utamaniligwa.
6 Niye nowehila iwanhu otambikila vinyago,
lakini niye nokutamanila gweye Mndewa Imulungu.
7 Nodeng'helela na kusekelela unogelo wako hawishaga,
kwavija gweye konyona vinigaya,
kojuwa magazo ga moyo wangu.
8 Gweye hunilekile nigeligwe mmakono ga iwanhu onihila,
kunimiza hanhu hana inyafasi.
9 Go Mndewa Imulungu, unyonele bazi,
niye nogaya na meso gangu gadonha kwa kugaya,
nabule nguvu mulukuli lwangu na mna iloho.
10 Ugima wangu udonha kwa lusikisiki,
ayo imiyaka yangu kwa kuiyalala.
Nabule nguvu mbuli ya kugaya,
hata mizege yangu inyala.
11 Iwanhu onihila onibezeli,
sambi nosekigwa na iwanhu weli behi na niye.
Mbwiga zangu onyona kamba kilozo,
wahanyona mnzila onikimbila.
12 Nisemwigwa kamba munhu yadanganike,
niye kamba nongo ibeneke beneke.
13 Nohulika wanhu wengi oinyong'onyela,
vinhu avo vogala bwembwe kila mwambu,
oisasala mbuli yangu, olonda kunikoma.
14 Lakini niye nokutamanila gweye, Mndewa Imulungu.
Nolonga, “Gweye kwa Imulungu wangu!”
15 Ugima wangu wammakono gako,
unikombole na iwanhu onihila,
unikombole na iwanhu onidununza.
16 Unimwemwesele kihanga chako niye msang'hanaji wako,
unikombole kwa unogelo wako hawishaga.
17 Sikuundeke nigwe kinyala gweye Mndewa Imulungu,
kwavija niye nokupula,
lakini waleke iwanhu wehile wagwe kinyala,
waleke wapotele tulu tulu ako kuzimu.
18 Ifunge imilomo ya iwanhu awo iwavizi,
wanhu awo oitapa na kubezeli,
awo owabezeli iwanhu wanogile.
19 Lola unogelo wako viwili mkulu,
kuwekila iwanhu okudumba gweye,
kutenda avo mbuli ya wose okukimbilila gweye,
mgameso ga iwanhu wose.
20 Kowafisa hanhu hanogile aho houkala,
kutali na magesa gehile ga iwanhu,
kowakaliza goya mdihema jako,
kutali na gehile golawa mmilomo ya wanhu.
21 Yatogolwe Mndewa Imulungu,
kwavija kanilagusila unogelo wake hawishaga viwili wa unzonza,
viwanizunguluke kamba buga divamilwe.
22 Na niye nilonga kwa bwembwe jangu,
“Nitupigwa kutali na meso gako.”
Lakini kuihulika sauti ya kupula kwangu,
vinikupulile unyonele bazi.
23 Mnogeleni Mndewa Imulungu, mweye iwanhu zake wose.
Mndewa Imulungu kowalola goya iwanhu omtamanila,
lakini kowakoboza kamba viilondigwa iwanhu oigoda.
24 Mugangamale na mufunge umoyo,
mweye mose mumbeta Mndewa Imulungu!