33
ZABULI YA 33
1 Mwimbileni Mndewa Imulungu kwa deng'ho,
mweye iwanhu wene haki.
Kumtogola Imulungu kowafaya iwanhu wene imizoyo inogile.
2 Mtogoleni Mndewa Imulungu kwa bango,
mwimbileni kwa kilimba kili na nzabi longo.
3 Mwimbileni lwila lwa sambi,
toweni bango na mutowe ng'henze za deng'ho.
4 Mbuli ya Mndewa Imulungu ya ukweli,
heyo kotamaniligwa mzisang'hano zake zose.
5 Imulungu konogezwa na ganogile na haki,
isi yose imema unogelo hawishaga wa Mndewa Imulungu.
6 Ulanga ulumbigwa kwa mbuli ya Mndewa Imulungu,
ivinhu vose vili kuulanga vilumbigwa kwa mhumuzi ya mulomo wake.
7 Kagalundiza gamazi ga ibahali kamba kisugulu,
vidibo va bahali kavika kukanho kamba munhu viyokwika ndiya.
8 Isi yose na imdumbe Mndewa Imulungu.
Iwanhu wose okala mwiisi wamtogole.
9 Kwavija kalonga na isi iwa kuko,
kalagiza na isi ilawilila.
10 Mndewa Imulungu kohindula mipango ya iwanhu wa isi ziyagwe,
na kogahindula ago gowolonda.
11 Mipango ya Mndewa Imulungu yosigala milele,
goyolonda gosigala ulelo mbaka ulelo.
12 Imweda isi ayo Imulungu wake ayo Mndewa Imulungu,
wamweda iwanhu yawasagule kamba iwanhu zake mwenyego.
13 Mndewa Imulungu kolola hasi kulawa kuulanga,
na kowalola iwanhu wose.
14 Kulawa hanhu hake hoyokala,
kowalola iwanhu wose okala mwiisi.
15 Heyo yalumbile mizoyo ya iwanhu wose,
heyo kojuwa kila kinhu kiwotenda.
16 Mndewa hakomboligwa kwavija kana wakalizi wengi,
na imunhu galu hohuma kwa nguvu zake nyingi.
17 Falasi wa ing'hondo hafaya kinhu ili munhu yahume,
nguvu zake nyingi hazidaha kumkombola munhu.
18 Lakini, Mndewa Imulungu kowalola iwanhu omdumba,
iwanhu obeta unogelo wake hawishaga,
19 heyo kowakombola kulawa mwiiifa,
koweka wagima kipindi cha nzala.
20 Mizoyo yetu yombetela Mndewa Imulungu.
Heyo ayo yotutaza na ngao yetu.
21 Todeng'helela kwa mbuli yake,
totamanila kwa twaga jake ding'ala.
22 Go Mndewa Imulungu, unogelo wako hawishaga ukale na siye,
kwavija siye tokutamanila gweye.