36
ZABULI YA 36
(Kwa kilanja, Zabuli ya Daudi msang'hanaji wa Mndewa Imulungu.)
1 Nzambi yolonga na imunhu yehile,
mgati mmoyo wake,
haduhu kumdumba Imulungu mgameso gake.
2 Imunhu yehile koinogela mwenyego,
na kogelegeza kamba gehile gake hagajuwigwa na kuduwiligwa.
3 Mbuli za mulomo wake ziha na za uvizi,
kaleka kugelegeza goya na kutenda ganogile.
4 Kogelegeza gehile mulusazi lwake,
koika mwenyego mnzila hainogile, hagalema gehile.
5 Unogelo wako hawishaga gweye Mndewa Imulungu,
uvika mbaka kuulanga,
kotamanilwa mbaka mmawingu.
6 Haki yako kamba lugongo lwa Imulungu,
nhaguso yako kamba kidibo,
kowakaliza iwanhu na iwanyama,
gweye Mndewa Imulungu.
7 Unogelo wako hawishaga gweye Mndewa Imulungu, unoga ng'hani!
Wana wa iwanhu okimbilila sisila da mabawa gako.
8 Okwiguta ukunona kwa ivinhu va mng'anda yako,
na kowagwaa king'waji kulawa kuulwanda lwa ganogile gako.
9 Kumwako gweye kuna nzasa ya ugima,
kudilenge jako tokona mulenge.
10 Gendeleza unogelo wako hawishaga kwa awo okujuwa gweye,
na haki yako kwa awo wene mizoyo inogile.
11 Sikuutogole wanhu oitapa wanivamile,
hebu iwanhu wehile wanikimbize.
12 Iwanhu otenda gehile wa hasi,
wakandamizwa na hawadaha kwinuka.