38
ZABULI YA 38
(Zabuli ya Daudi. Kopula yakumbukigwe na Imulungu.)
1 Go Mndewa Imulungu, sikuunizume kwa ng'hasiliki yako,
sikuunikoboze wahagevuzika.
2 Misale yako inihoma,
na mkono wako unizila niye kulawa uchanha.
3 Haduhu hanhu haholile mulukuli lwangu,
kwavija gweye kugevuzika,
haduhu zege digangamale,
mbuli ya nzambi yangu.
4 Nzambi zangu zinigubika,
kamba zigo kulu dimulemelaga munhu.
5 Milonda yangu yola na yonung'ha,
mbuli ya ubozi wangu.
6 Ninamizwa hasi na kuhumuluswa,
imisi yose nozunguluka kuno noiyalala.
7 Kigudi changu kimema usungu,
haduhu ugima mulukuli lwangu.
8 Nonyolila na kuhondigwa,
nogutilila mbuli ya usungu uli mmoyo wangu.
9 Go Mndewa, vose vinisulukila kuvijuwa,
kugutilila kwangu kokujuwa goya.
10 Moyo wangu odunda,
nguvu nabule, hata meso gangu gavulala.
11 Mbwiga zangu na wayangu, okala kutali na niye mbuli ya utamu wangu,
iwanhu okala behi na niye okwima kutali.
12 Waja ozahila ugima wangu, otega mitego yao,
waja olonda niye nilumile onilonga vihile,
na ogelegeza gehile siku zose.
13 Niye na kamba mvugu, sihulika,
kamba imunhu bubui hodaha bule kulonga.
14 Ona na kamba munhu hahulika, imunhu hedikaga mbuli bule.
15 Go Mndewa Imulungu, niye nokubeta gweye,
gweye kokwidika gweye Mndewa, Imulungu wangu.
16 Kwavija niye nilonga, “Sikuuwaleke wadeng'helele mbuli yangu,
na sambi waitape mbuli ya kugwa kwangu.”
17 Kwavija na mmabehi kugwa,
na usungu wangu onigaza siku zose.
18 Nolonga gehile gangu,
nogazika kwa nzambi yangu.
19 Iwanhu onihila wana nguvu,
iwanhu onihila bila mbuli yoyose wengi ng'hani.
20 Oniliha gehile kwa gaja ganogile ganitendile,
onilema nahatenda ganogile.
21 Go Mndewa Imulungu, sikuundeke,
sikuukale kutali na niye, gweye Imulungu wangu.
22 Go Mndewa, Mkombola wangu, wize hima unitaze.