39
ZABULI YA 39
(Zabuli ya Daudi. Kwa kilanja, yatumie modeli wa Yedutuni.)
1 Nilonga, “Noilola goya, sambi nitende gehile kwa lulimi lwangu,
nofunga mulomo wangu sikunilonge siku zose iwanhu wehile viweli behi na niye.”
2 Nikala silonga, ninyamala tuluu,
na ning'hali nabule tamanilo na usungu wangu ubanza.
3 Moyo upata moto mgati yangu,
vinigelegeze ukwaka moto,
avo nilonga kwa lulimi lwangu.
4 “Go Mndewa Imulungu, nilongele ikimambukizo cha ugima wangu,
na siku zangu vizili,
na nijuwe avija ugima wangu viwili mguhi.
5 Kuutenda ugima wangu mguhi kamba kidole nyomhwa,
siku zangu za kukala kamba mduhu kinhu kumwako,
ugima wa kila munhu kamba mhumuzi.
6 Kila munhu kamba nzozi kochola kuno na kuno,
koigaza na vinhu vingi lakini kogaya bule,
Kokwika vinhu lakini hajuwa nani yonda yasole.
7 Avo, sambi Mndewa, niye nobeta choni?
Niye nokutamanila gweye.
8 Nihonye kulawa mzinzambi zangu zose,
sikuutogole wabozi wanibezeli.
9 Niye na bubui, sifungula bule mulomo wangu,
kwavija gweye ayo utendile gano.
10 Nisegesele mbalati yako,
nopotela kwa mikubulo ya makono gako.
11 Kowakoboza na kowazuma iwanhu mbuli ya nzambi zao,
kounanga utajili wao kamba mbumundu viyonanga.
Ugima wa kila munhu kamba mhumuzi.
12 Utegeleze kupula kwangu, gweye Mndewa Imulungu,
tega gwiti jako uhulike vinilila,
sikuunyamale nahalila,
niye na kamba mgeni yobita nzila,
niye na mbita nzila kamba viwakalile wahenga zangu wose.
13 Sikuundole ili niye nideng'helele kidogo,
ning'hali sinadanganika na kulawanya.”