40
ZABULI YA 40
(Kwa kilanja, Zabuli ya Daudi.)
1 Nimbeta Mndewa Imulungu,
na heyo kaninamila na kategeleza kulila kwangu.
2 Kanilava kulawa mdisimo da kubanangigwa,
kulawa mmatope na utelevu,
kanimiza goya uchanha ya dibwe,
na kanigwaa hanhu hanogile ha kwima.
3 Keka lwila lwa sambi mmulomo wangu,
lwila lwa kumtogola Mndewa Imulungu wetu.
Wengi wone na wadumbe na wamtamanile Mndewa Imulungu.
4 Kamweda imunhu yomtamanila Mndewa Imulungu,
yoleka kuwatamanila wene nyodo,
awo oukweleleza uvizi.
5 Go Mndewa Imulungu, Imulungu wangu kutenda mbuli za unzonza.
Mbuli ziutwikile haduhu munhu yoyose kamba gweye,
maza nilongile na kugasimulila gahandemele.
6 Gweye hulonda nhosa na sadaka,
lakini kuvugula magwiti gangu,
nhosa za kusoma moto na nhosa za kusegesa nzambi huzilondile.
7 Abaho nilonga, “Lola niye niza,
nyandikigwa mna ikitabu cha malagizo.
8 Go Mndewa Imulungu, nosulukila kutenda gaja goulonda,
malagizo gako gammoyo wangu.”
9 Niwapetela iwanhu mbuli ya haki na ukombola wako mumting'hano mkulu,
sinyamale bule, go Mndewa Imulungu gweye kojuwa.
10 Sifisile haki yako mmoyo wangu,
nolonga mbuli ya kutamanilwa kwako na ukombola wako.
Sifisile unogelo wako hawishaga na kutamaniligwa kwako,
kuulongozi wa umting'hano wa iwanhu wengi.
11 Go Mndewa Imulungu, sikuudikimilize bazi jako,
unogelo wako hawishaga na kweli yako siku zose vinikalize.
12 Kwavija magazo hagapetigwa ganizunguluka,
nzambi zangu zinigoga mbaka sidaha kulola.
Ziwa nyingi kubanza mvili zili mdipala jangu,
na moyo osinduka mgati mmwangu.
13 Go Mndewa Imulungu, utogole kunikombola,
go Mndewa Imulungu, wize himahima unitaze.
14 Wose ozahila kuusegesa ugima wangu,
wagwe kinyala na kugazwa,
wose olonda niye nigaye,
wabwezigwe kuchugu kwa kinyala.
15 Waja okala onisimanga,
wagazwe mbuli ya kinyala chao.
16 Avo wose okuzahila,
wadeng'helele na kukemelela mbuli yako.
Waja oulonda ukombola wako,
walonge siku zose, “Mndewa Imulungu ayo Imkulu!”
17 Lakini niye mkiwa na nolonda vinhu,
Mndewa yanigelegeze.
Gweye ayo mtazaji wangu na mkombola wangu,
go Imulungu, sikuukawe.