42
ZABULI YA 42
(Kwa kilanja, Lwila lwa ulelo wa Kola.)
1 Kamba mhala viyogasulukila mazi ga ulwanda,
vivo vinikusulukila, gweye Mndewa Imulungu.
2 Loho yangu yomonela ng'hilu Imulungu, Imulungu yeli mgima.
Lini nochola koneka kuulongozi wa Imulungu?
3 Mahozi gagalamuka ndiya yangu imisi na ikilo,
akuno iwanhu onongela imisi yose, “Imulungu wako kakwahi?”
4 Novikumbuka vinhu vino, nahaigubula loho yangu.
Vinicholile na wanhu bwando, niwalongoza kuchola mng'anda ya Imulungu,
tuchola kwa deng'ho na nyila za kumtogola,
tuigoga nyimwilinyimwili.
5 Loho yangu habali konyuluka?
Habali kuhomba mgati yangu?
Mtamanile Imulungu,
kwavija niye nomtogola kabili,
heyo ayo mkombola wangu.
6 Imulungu wangu, loho yangu yonyuluka mgati yangu,
avo nokukumbuka gweye mwiisi ya Yolidani na kulugongo lwa Helimoni,
na kulawa kulugongo lwa Mizali.
7 Nigaligwa mgamazi mengi,
ng'huta za mazi za behi yangu,
gogala mibulumo iyagwe,
ng'humbi yako ng'hulu ingubika.
8 Mndewa Imulungu kolagusa unogelo wake hawishaga imisi,
ikilo lwila lwake lwa hamoja na niye,
lwila alo lwa kumpula Imulungu wa ugima wangu.
9 Nomulongela Imulungu, dibwe jangu,
“Habali kunisemwa?
Habali nigendelele kuiyalala kwa koneligwa na iwanhu onihila?”
10 Wanhu onihila oniliga kamba onihonda mizege yangu,
onilonga imisi yose,
“Imulungu wako kakwahi?”
11 Loho yangu habali konyuluka?
Habali kuhomba mgati yangu?
Mtamanile Imulungu,
kwavija niye nomtogola kabili,
heyo ayo mkombola wangu na Imulungu wangu.