48
ZABULI YA 48
(Zabuli ya ulelo wa Kola.)
1 Mndewa Imulungu ayo imkulu na kofaya kutogolwa,
kudibuga da Imulungu wetu, lugongo lwake lung'ala,
2 lunoga na lutali ng'hani, deng'ho da isi yose.
Nhembeti za Safoni kamba lugongo lwa Sayuni,
dibuga da Mndewa Imkulu.
3 Imulungu kamzingome zake,
kailagusa mwenyego kamba mkalizi.
4 Lola iwandewa viwailumbile na kuchola hamoja,
5 bahaja viwamone wakanganya,
wakimbila kwa bwembwe.
6 Wasonga kugwaya kuko,
wona usungu kamba wa mtwanzi yolonda kulela.
7 Wabanangwa kamba meli ng'hulu za Talishishi,
zibenigwe na beho da umwambu wa kudilawila zuwa.
8 Kamba vituhulike,
vivo vitone kudibuga da Mndewa Imulungu yeli na udahi wose,
kudibuga da Imulungu wetu, Imulungu kodikaliza milele.
9 Go Imulungu, mng'anda yako tougelegeza unogelo wako hawishaga.
10 Kamba twaga jako vidijuwika kila hanhu,
vivo kila munhu yakutogole gweye mbaka kuihelela isi yose,
mkono wako wa ukudila umemezwa haki.
11 Lugongo lwa Sayuni lodeng'helela,
vijiji va Yuda vodeng'helela,
kwa nhaguso zako.
12 Tembeleni Sayuni, zungulukeni kudibuga,
muvipete ivilingo vake.
13 Gelegezeni ziluwa zake,
loleni ngome zake,
ili musimulile mbuli zake kwa ulelo ukwiza.
14 Kwavija ino Imulungu ayo Imulungu wetu,
siku zose na milele kokuwa kilongozi wetu.