49
ZABULI YA 49
(Kwa kilanja, Zabuli ya ulelo wa Kola.)
1 Tegelezeni gano mweye iwanhu wa isi zose,
Hulikeni mweye mose mkala mwiisi ino.
2 Wose, iwakulu na iwadodo,
matajili na wakiwa.
3 Mulomo wangu olonga mbuli za ubala,
magesa gangu golava nzewele.
4 Notega gwiti jangu nhegeleze nongezi,
notegula kitendawili kwa bango.
5 Habali nidumbe siku za magazo,
iwanhu wavizi wahanizunguluka?
6 Awo otamanila vinhu vao,
na oitapa kwa utajili wao.
7 Haduhu munhu yoyose yodaha kuugombola ugima wa munhu iyagwe,
hebu yamlihe Imulungu bei ya ugima wake mwenyego,
8 kwavija bei ya ugima ibanza ng'hani,
na yokala vivo milele,
9 ili yakale mgima milele,
na sikuyengile mdipanga.
10 Avo wose okona kamba iwanhu wabala odanganika,
na wabozi na mizozolo vivija opotela,
na owalekela iwanhu wayagwe vinhu vao vose.
11 Mapanga gao gokuwa ng'anda zao milele,
kae za ulelo wose,
hamoja wakala na migunda ikemigwe kwa matwaga gao.
12 Munhu muutajili wake hasigala siku zose,
heyo kodanganika kamba mng'onyo.
13 Kino acho kimambukizo cha awo oitamanila mwenyego,
na awo owakweleleza na onogelwa na ulonzi wao.
14 Kamba ng'hondolo ochola kuzimu,
na ifa yowalongoza.
Iwanhu wanogile owatawala imitondo,
na ng'huli zao zokola kudipanga,
okala kutali na ming'anda yao inogile.
15 Lakini Imulungu konigombola kulawa kuzimu,
ona konisola kumwake.
16 Sambi udumbe munhu yahapata utajili,
ukulu wa ng'anda yake wahongezeka,
17 kwavija yahadanganika hasola kinhu chochose,
ukulu wake hachola nao.
18 Hamoja viyakalile mgima kayona kamweda,
na iwanhu wamtogola kamba katenda goya,
19 kochola kwa iwahenga zake wadanganike mwaka,
kuko hawawona umulenge milele.
20 Munhu yeli tajili lakini kabule nzewele,
kaigala na wang'onyo ofa.