50
ZABULI YA 50
(Zabuli ya Asafu.)
1 Imulungu mwene nguvu,
Mndewa Imulungu kolonga na kuikema isi yose,
tangu kudilawila zuwa na kudiswela.
2 Kulawa Sayuni, hanhu hatelele kwa unovu,
Imulungu komwemwesa.
3 Imulungu wetu kokwiza na hanyamala bule,
moto usakaza omulongolela,
akuno kazungulukwa na kukuzumbi.
4 Koukema ulanga ukalaga uchanha ng'hani,
na koikema isi ili vilole vonda yawataguse wanhu zake.
5 “Wating'hanizeni iwanhu wangu otamanilwa,
awo watendile lagano na niye kwa nhosa.”
6 Ulanga osimulila haki yake,
kwavija Imulungu mwenyego ayo msemi.
7 “Tegelezeni mweye wanhu zangu, na niye nolonga,
gweye Izilaeli na niye nowasindila.
Niye ayo Imulungu, Imulungu wenu.
8 Sikukomhokela mbuli ya nhosa zako,
hebu nhosa zako za kusoma moto.
Siku zose za kuulongozi wangu.
9 Siwalonda ng'ombe wa banda jako,
hebu mbuzi kulawa kudibumba jako.
10 Kwavija kila mnyama wa kumuhulo wangu niye,
fugo uchanha ya vigongo elufu wangu niye.
11 Nimtanga kila ndege kulugongo,
nao viumbe weli kukonde wangu niye.
12 Maza ng'halile na nzala sambi niwalongele mweye,
kwavija isi yose na vose vikala mumo vangu niye.
13 Vino, niye noja nyama ya ng'ombe mbigalo,
hebu nong'wa damu ya mbuzi?
14 Mulavile Imulungu nhosa za kumtogola,
na uvikize gaja gaulongile kwa ayo yokala Uchanha Ng'hani.
15 Unikeme siku ya magazo,
na niye nokuhonya na gweye konitogola.”
16 Lakini kwa iwanhu wehile, Imulungu kolonga,
“Gweye kuna haki gani kulonga malagizo gangu,
na kulonga lagano jangu mmulomo wako?
17 Kwavija gweye kulema kuzumwa,
na kugalema malagizo gangu.
18 Uhamona mbavi koilumba na heyo,
koilumba na wagoni.
19 Kuleka mulomo wako ulonge gehile,
na lulimi lwako lolonga bunyiko.
20 Siku zose komdeta ndugu yako,
na komtendela uchakubimbi mwana wa mamako.
21 Gago gose kugatenda na niye ninyamala tuluu,
kogizaga niye na kamba gweye.
Lakini niye nokuzuma na nokukomhokela.”
22 “Gelegezeni gano mweye munisemwaga niye Imulungu,
ama nowadega vihande vihande,
na haduhu munhu yodaha kuwakombola.
23 Imunhu yolava nhosa za kunitogola,
ayo iyo yonitegeleza niye,
imunhu yokweleleza nzila yangu,
ayo nomulagusila ukombola wangu niye Imulungu.”