51
ZABULI YA 51
(Kwa kilanja. Zabuli ya Daudi viyeshilize kukomhokeligwa na mtula ndagu Natani mbuli ya kutenda ugoni na Batisheba.)
1 Go Imulungu, unyonele bazi,
kamba unogelo wako hawishaga viwili mkulu,
kamba vidili kulu bazi jako,
ugasegese gehile gangu.
2 Ugakoshe gehile gangu,
uzisegese nzambi zangu.
3 Kwavija nogatanga gehile gangu,
na nzambi yangu ya kuulongozi wangu siku zose.
4 Kumwako gweye uiyeka nhenda nzambi,
na nhenda gehile mgameso gako,
avo magesa gako ga haki,
nhaguso yako itelela.
5 Lola niye nileligwa kamba mwene nzambi,
niye na mwene nzambi tangu mamangu viyageligwe inda yangu.
6 Gweye konogezwa na kweli ilawa mmoyo,
mgati mmoyo wangu konifunza ubala.
7 Unikoshe kwa bunho da hisopo na niye nong'ala,
unikoshe na niye nokuwa mzelu kubanza pamba.
8 Unitende nihulike seko na deng'ho,
mizege yangu yuuhondile ideng'helele.
9 Ukifise kihanga chako sambi ulole nzambi yangu,
na ugafute gehile gangu gose.
10 Gweye Imulungu unilumbile moyo ung'alile,
uilumbe kabili loho itindiwale mgati mmwangu.
11 Sambi unitupe kutali na gweye,
sikuunisegesele loho wako yang'alile.
12 Unibwezele kabili deng'ho jangu da ukombola,
unigwelele loho ya kugoga igako.
13 Abaho nowafunza iwanhu wehile nzila zako,
na wene nzambi okuhindukila gweye.
14 Gweye Imulungu unikombole na nzambi ya kwita damu,
gweye Imulungu mkombola wangu,
lulimi lwangu lokwimba haki yako.
15 Go Mndewa, fungula mulomo wangu,
na lulimi lwangu lolonga ukulu wako.
16 Gweye hunogezwa na nhosa,
maza ikalile ivo nahakulavile,
gweye hunogezwa na nhosa za kusoma moto.
17 Ila nhosa zilondigwa na Imulungu ayo loho ihondeke,
na moyo uhondeke na ulongaga ng'hosa,
gweye Imulungu huubezeli bule.
18 Kwa ganogile gako uitende Sayuni igendelele,
uluzenge kabili luwa lwa Yelusalemu.
19 Abaho hokuwa na nhosa zitelele,
na nhosa zose za kusoma moto zikunogeza ng'hani,
na ng'ombe mbigalo olavigwa muupango wako wa nhosa.