55
ZABULI YA 55
(Zabuli ya Daudi. Kwa kilanja, yatumie nyuzi za bango.)
1 Gweye Imulungu tegeleza kupula kwangu,
na sikuubezeli ulonzi wangu.
2 Nitegeleze na unidike.
Magesa gangu gonigaza na kunyuluka.
3 Mbuli ya sauti ya imunhu yonihila,
kwa kuloligwa na iwanhu onihila,
kwavija ongalila magazo,
na oniliga kwa kugevuzika.
4 Moyo wangu umema usungu,
bwembwe da ifa dingubika.
5 Bwembwe na kugwaya vinizunguluka,
bwembwe kulu dingoga.
6 Nilonga, “Maza ng'halile na mabawa kamba njiwa!
Nahaguluke nichole kutali nikabwihile.
7 Nahacholile kutali ng'hani,
nahakalile kuluwala.
8 Nahalopole kuchola hanhu hanogile,
kutali na kukuzumbi na magazo.”
9 Go Mndewa, uwabanange iwanhu onihila,
na uwatende sikuwaitogolele viwolonga,
kwavija nyona migomvi na ndwagi kudibuga.
10 Imisi na ikilo ozunguluka uchanha ya luwa lwake,
gehile na magazo va mgati yake.
11 Nguvu za ubananzi zosang'hana kudibuga,
bwembwe na uvizi havisegela kudigulilo.
12 Maza imunhu yonihila yaniligile,
nahagelile kumgongo,
maza imunhu yonihila yainule kumwangu,
nahaifisile sikuyanyone.
13 Lakini kumbe gweye miyangu,
mbwigangu nikutangile ng'hani.
14 Ayo tukalile toisekela kimbwiga,
vitukalile tochola hamoja na wanhu wayagwe mng'anda ya Imulungu.
15 Leka ifa iwezile himahima iwanhu onihila,
na wachole kuzimu kuno wang'hali wagima,
kwavija gehile ga mgati yao.
16 Lakini nomkema Imulungu,
na Mndewa Imulungu konikombola.
17 Imitondo, imisi na ichungulo,
nolila kwa magazo,
na heyo koihulika sauti yangu.
18 Konikombola na nokala goya kulawa kung'hondo,
hamoja iwanhu wengi onilema.
19 Imulungu yotawala kulawa milele,
kowahulika na kowakoboza iwanhu onihila,
kwavija hawahindula nzila zao,
na hawamdumba Imulungu.
20 Miyangu kawavamila mbwiga zake,
na kabena lagano jake.
21 Mbuli zake zamulile kubanza uki,
hata ivo mmoyo wake kuna ng'hondo,
mbuli zake zonyilibuka kubanza mavuta,
lakini zokanha kamba sime dinoligwe.
22 Mdikwe Mndewa Imulungu magazo gako,
na heyo kokudahiza,
hamuleka ng'o imunhu mwene haki yagwe.
23 Lakini gweye Imulungu kowagala hasi kudisimo da ubananzi,
wanhu okwita damu na wehile,
hawakala wagima nusu ya siku zao.
Lakini niye nokutamanila gweye.