56
ZABULI YA 56
(Kwa kilanja, yatumie modeli wa, “Huwa yalawile kutali yahumule.” Zabuli ya Daudi mbuli ya kipindi viyagogigwe na Wafilisiti ako Gati.)
1 Gweye Imulungu unyonele bazi,
kwavija wanhu onivamila ng'hani,
imisi yose okwengeza kunidununza.
2 Awo iwanhu onihila onikweleleza imisi yose,
onivamila kwa kuitapa kwao.
3 Bwembwe dahangoga,
nokutamanila gweye.
4 Kwa Imulungu kumwake noditogola twaga jake,
kwa Imulungu notamanila, sidumba bule.
Imunhu yofa konitenda choni?
5 Imisi yose ozihindula mbuli zangu,
siku zose ogelegeza kunilumiza.
6 Oilumba kunitendela gehile na oifisa,
olola kila hanhu kunibita,
kuno osulukila kunikoma.
7 Gweye Imulungu uwakoboze mna ing'hasiliki yako,
uwabwanhe iwanhu wa isi ziyagwe.
8 Yandika kuiyalala kwangu,
gandike mkitabu chako mahozi gangu.
Vino gago gakuduhu mkitabu chako cha kumbukumbu?
9 Avo iwanhu onihila obwela kuchugu,
nahakukema unitaze.
Kwa mbuli ayo,
notanga kamba Imulungu ka ubanzi wangu.
10 Nomtamanila Imulungu na noitogola mbuli yake,
nomtamanila Mndewa Imulungu na noitogola mbuli yake.
11 Kwa Imulungu notamanila na sidumba bule.
Imunhu konitenda choni?
12 Gweye Imulungu niye niiduwila kumwako,
nokulavila sadaka za kukutogola.
13 Kwavija kunikombola kulawa mkifo,
na kunikaliza sikunigwe hasi,
ili nichole kuulongozi wa Imulungu kudilenge da ugima.