57
ZABULI YA 57
(Kwa kilanja, yatumie modeli wa, “Sikuubanange!” Zabuli ya Daudi mbuli ya kipindi viyamkimbile Sauli kuimhango.)
1 Unyonele bazi, gweye Imulungu, unyonele bazi,
kwavija moyo wangu okukimbilila gweye.
Kuna imbeho ya mabawa gako nokimbilila,
mbaka kukuzumbi dibite.
2 Nomlilila Imulungu yeli uchanha ng'hani,
Imulungu yovikizaga gaja goyolonda kumwangu.
3 Konitaza kulawa kuulanga na konikombola,
kowakomhokela iwanhu onikweleleza ng'hani,
Imulungu kogala unogelo wake hawishaga na kutamanilwa kwake.
4 Niye na hagati ya simba,
niwasa hagati ya iming'onyo ili na nzala ng'hulu,
iwanhu meno gao kamba migoha na misale,
milimi yao kamba sime dinoligwe.
5 Gweye Imulungu, utogolwe uchanha kuulanga,
na isi yose imemezwe ukulu wako.
6 Waitegela lwavu migulu yangu,
moyo wangu una lusikisiki,
wahimba simo kuulongozi wangu,
lakini wadumbukila mgati yake.
7 Gweye Imulungu moyo wangu ugangamala,
ona, moyo wangu ugangamala,
nokwimba,
nokwimba lwila.
8 Lamuka gweye loho yangu,
lamuka gweye bango na kilimba,
noilamusa imitondo.
9 Nokushukulu gweye, Mndewa hagati ha iwanhu wose,
hagati ya iwanhu wa isi zose nokwimba nhogolwa.
10 Kwavija unogelo wako hawishaga okwenela mbaka kuulanga,
na kutamanilwa kwako mbaka mmawingu.
11 Gweye Imulungu, utogolwe uchanha kuulanga,
na isi yose imemezwe ukulu wako.