58
ZABULI YA 58
(Zabuli ya Daudi. Kwa kilanja, yatumie modeli wa, “Sikuubanange!”)
1 Mweye iwatawala, vino molonga kwa haki?
Vino motagusa viilondigwa hagati ya iwanhu?
2 Bule! Mmizoyo yenu mogelegeza gehile,
kwa makono genu mogala gehile mwiisi.
3 Wanhu wehile wainega tangu kuleligwa kwao.
Tangu mmunda wapotela na olonga uvizi.
4 Sumu yao kamba sumu ya zoka,
kamba muyombo yasilile magwiti gake,
5 ayo hohulika sauti ya mganga yolagula,
hata mganga yolagula kwa kutowa nyanga.
6 Gweye Imulungu ibene imizino mmilomo yao,
gweye, Mndewa Imulungu uibene misaya ya simba.
7 Waleke wasegele kamba mazi gokilima himahima,
wahakwega upinde misale yao iwe dugi.
8 Kamba kola difile,
kamba king'hele yaleligwe yafile sikuwajone zuwa.
9 Nongo zenu hazinapata moto kwa ngodi za miba,
mibisi hebu inyalile awo okuwa wasegeswa wose.
10 Wene haki odeng'helela wahawona wehile obwezelwa,
na oibojoga damu ya iwanhu wehile.
11 Avo iwanhu olonga, “Wene haki wana nhunza,
kweli kauko Imulungu yoitagusa isi.”