59
ZABULI YA 59
(Kwa kilanja, yatumie modeli wa, “Sikuubanange!” Zabuli ya Daudi mbuli ya kipindi Sauli viyatumile wanhu wampelembe ili wamkome.)
1 Gweye Imulungu unihonye mmakono ga iwanhu onihila,
unikalize kulawa kwa awo onivamila.
2 Unikombole kulawa kwa awo otenda gehile,
na unikombole kulawa kwa awo wetaga damu.
3 Lola, oifisa olonda kunikoma,
iwanhu wasede ogala migomvi kumwangu,
hamoja niye sitendile nzambi hebu gehile, go Mndewa Imulungu.
4 Niye sitendile dihile ila hewo waitanda kunivamila.
Go Mndewa Imulungu,
wize unitaze ulole sambi vinili.
5 Gweye, Mndewa Imulungu kuna udahi wose.
Winuke uwakoboze iwanhu wa isi zose,
sikuumuleke mgima hata imoja hagati ya awo otenda gehile.
6 Kila ichungulo obwela,
obwaka kamba umbwa,
na ozunguluka mgati ya dibuga.
7 Galole gaja gowotema kulawa mmilomo yao,
otema misime inoligwe mmilimi yao.
Na hewo olonga, “Nani yonda yatuhulike?”
8 Lakini gweye, Mndewa Imulungu kowaseka,
kowabezeli iwanhu wa isi zose.
9 Gweye kwa nguvu yangu nokulola gweye,
gweye Imulungu ayo ngome yangu.
10 Imulungu wangu kwa unogelwa wake hawishaga konizila,
Imulungu konitenda niwalole iwanhu onihila viwohumwa.
11 Sikuuwakome,
buleavo iwanhu zangu oisemwa vuuwakoboze.
Kwa udahi wako uwatende tanga nzulule na uwabwanhe hasi,
gweye Mndewa ayo ngao yetu.
12 Mbuli ya nzambi za milomo yao,
na kwa mbuli za milomo yao,
waleke wagogwe kwa kuitapa kwao.
Mbuli ya makungu na uvizi wao,
13 uwasakaze kwa ng'hasiliki yako,
uwasakaze mbaka wasegesigwe,
ili wanhu watange kamba Imulungu ayo yotawala kwa Yakobo,
na kotawala mbaka kuihelela isi yose.
14 Kila ichungulo obwela,
obwaka kamba umbwa,
na ozunguluka mgati ya dibuga.
15 Obemhela kuzahila ndiya,
kamba hawegute owasilila.
16 Lakini niye nokwimba mbuli ya nguvu zako.
Nokwimba kwa sauti imitondo kwa unogelwa wako hawishaga.
Kwavija kumwangu niye gweye kwa ngome yangu,
na hanhu ha kukimbilila mwiisiku ya magazo.
17 Gweye kwa nguvu zangu,
niye nokwimbila kwa deng'ho,
kwavija Imulungu ayo ngome yangu,
Imulungu umemile unogelwa hawishaga.