60
ZABULI YA 60
(Kwa kilanja yatumie modeli ya lwila lwa, “Besa da Lagano.” Lwila lwa Daudi lwa kufundizila mbuli ya kipindi viyaitowile na Waalamu kulawa Nahalaimu na Soba. Kipindi acho Yoabu viyabwelile kawakoma Waedomu elufu kumi na mbili ako Kubonde da Mkele.)
1 Gweye Imulungu kutulema na kutuhonda,
gweye kutugevuzikila, avo sambi tubweze kabili.
2 Kuitigisa isi na kuitula,
uzibe ulwatu kwavija yotigisika.
3 Kuwatenda wanhu zako wapate magazo,
mbaka hatudaha kugendelela.
4 Kusimika bendela kamba kilaguso kwa waja wose okudumba,
ili wahonyeke na misale ya iwanhu wehile.
5 Wose uwanogela wakombolwe,
utukombole kwa mkono wako wa ukudila na utwidike.
6 Imulungu kalonga kwa kung'ala kwake,
“Kwa kuhuma noigola isi ya Shekemu,
na nodipima vihande vihande bonde da Sukoti.
7 Isi ya Gileadi yangu niye na isi ya Manase yangu niye,
isi ya Efulaimu ayo kamba kofia jangu da zuma.
Isi ya Yuda ayo kamba fimbo yangu ya utawala.
8 Isi ya Moabu ayo kamba bakuli jangu da kunawila,
kwa isi ya Edomu notupa kilatu changu,
na niye nodeng'helela kwa kuwahuma Wafilisiti.”
9 Nani yonda yanigale kudibuga dizungulukwe na luwa lwa mabwe?
Nani yonda yanilongoze mbaka Edomu?
10 Gweye, Imulungu siyo gweye utulemile siye?
Gweye Imulungu hucholile na siye kuing'hondo.
11 Ututaze mbuli ya iwanhu otwihila,
kwavija msaada wa munhu haufaya kinhu.
12 Imulungu yahakala na siye tohuma,
na heyo kowabojoga hasi iwanhu otwihila.