62
ZABULI YA 62
(Zabuli ya Daudi. Kwa kilanja, yatumie modeli wa Yedutuni.)
1 Kwa Imulungu yaiyeka loho yangu yobwihila,
ukombola wangu olawa kumwake.
2 Heyo yaiyeka ayo dibwe jangu na ukombola wangu,
heyo ayo ngome yangu, niye sigwaya bule.
3 Mbaka lini monivamila?
Mbaka lini mweye mose monibwanha hasi,
kamba kiwambaza kisonga kubomoka?
4 Waitanda kunilagaza kulawa hanhu ha heshima,
odeng'helela uvizi.
Kwa imilomo yao otambika,
lakini mgati mmizoyo yao oduwila.
5 Kwa Imulungu yaiyeka loho yangu yobwihila,
tamanilo jangu dolawa kumwake.
6 Heyo ayo dibwe jangu na ukombola wangu,
heyo ayo ngome yangu niye sigwaya bule.
7 Ukombola wangu na ukulu volawa kwa Imulungu,
heyo ayo dibwe da nguvu na kimbililo jangu.
8 Mweye wanhu, mtamanileni Imulungu siku zose,
Ifunhuleni mizoyo yenu kumwake heyo,
Imulungu ayo kimbililo jetu.
9 Iwanhu wose kamba mhumuzi,
wose wakulu kwa wadodo hawafaya kinhu.
Uhawapima hawavika kilo imoja,
hewo wose wabewe kubanza mhumuzi.
10 Sikuutamanile uzulumati,
hebu kwika tamanilo mna ivinhu va ubavi,
utajili wako wahongezeka sikuuwike mmoyo wako.
11 Mwanza umoja Imulungu kalonga,
miyanza mibili niihulika mbuli ino,
kamba udahi wa Imulungu,
12 na unogelwa hawishaga wa Mndewa,
na heyo komuliha kila munhu kamba viyasang'hane.