65
ZABULI YA 65
(Kwa kilanja, Zabuli ya Daudi na lwila.)
1 Go Imulungu, gweye kofaya kutogoligwa ako Sayuni,
kumwako gweye iwanhu ogavikiza gaja gawalongile.
2 Gweye widikaga kupula,
avo wanhu wose okwizila gweye.
3 Nzambi nyingi zahatugoga,
gweye ayo ugelaga kumgongo gehile getu.
4 Kamweda imunhu yumsagule na kumgala behi na gweye,
ili yakale kuuluwa lwako.
Siye toshiba ganogile ga ng'anda yako,
ganogile geli mng'anda yako ing'ala.
5 Kwa unzonza kotwidika kwa haki,
gweye Imulungu wa ukombola wetu,
gweye ayo tamanilo da wanhu wose okala kuihelela isi,
na wanhu okala umwambu wa bahali.
6 Gweye ulumbile vigongo kwa udahi wako,
gweye kuna nguvu zose,
7 gweye uzitendaga ng'humbi za bahali zinyamale,
na kubuma kwa ng'humbi na ndwagi za iwanhu wa isi zose.
8 Wose okala kuihelela isi okanganya vilaguso vako.
Kotenda isi kudilawila zuwa na kudihongela zuwa ideng'he.
9 Koitembelela isi na koigelela mazi,
koitenda imwede,
vizanda va Imulungu vimema mazi,
kowagwelela ndiya iwanhu,
kwavija gweye vivo ulondile.
10 Kuidodeza miloka yake,
na kugatelebusa matuta gake,
kovitelebusa kwa luwaga,
na kuitenda iminoga imwede.
11 Kwavija kuimwedeza isi, kuna ndiya nyingi mumsimu wa kusenga,
kokose kuucholile kuna ndiya nyingi.
12 Luwala lumema mijani ya kudimila fugo,
vigongo vimema deng'ho.
13 Hanhu ha kulugongo hamema fugo,
makonde ganogezwa kwa ndiya,
vose vokemelela na kwimba kwa deng'ho.