66
ZABULI YA 66
(Kwa kilanja, lwila na Zabuli.)
1 Mweye wanhu wa isi yose guteni nyangi za deng'ho kwa Imulungu.
2 Ditogoleni twaga jake,
mumgwee heyo nhogolwa.
3 Mulongeleni Imulungu, “Sang'hano zako za unzonza!
Nguvu zako zibanza ng'hani,
mbaka iwanhu okwihila oidulika na kudumba.
4 Iwanhu wa isi yose okutambikila gweye,
na okwimbila nhogolwa na oditogola twaga jako.”
5 Izoni mulole gaja gayatendile Imulungu.
Sang'hano zake za unzonza kwa iwanhu wa mwiisi.
6 Kahindula bahali iwa isi inyalile,
waloka kwa magulu mgamazi.
Avo, siye tomdeng'helela heyo.
7 Heyo kotawala kwa udahi wake milele,
meso gake kowalola iwanhu wa mwiisi,
iwanhu omulema sambi wenuke.
8 Mtogoleni Imulungu wetu mweye iwanhu,
longeni sauti ya nhogolwa zake na wayagwe wahulike.
9 Heyo katutenda tuwe wagima,
na hagalekile magulu getu gatelebuke.
10 Kwavija gweye Imulungu kutugeza,
kutusunha kamba shaba viisunhigwa mmoto.
11 Kutuleka tugogwe muulwavu,
kutupapiza mizigo mikulu mmigongo yetu.
12 Kuwaleka iwanhu watubojoge,
tugenda mmoto na mmazi,
lakini kutugala mwiisi ya kumweda.
13 Nokwiza mng'anda yako na nhosa za kusoma moto,
nogavikiza gaja ganiiduwile kumwako.
14 Gaja ganongile kwa mulomo wangu,
na kuiduwila ving'halile mmagazo.
15 Nokulavila nhosa za kusoma moto za wanyama wanenehe,
na nhosa za kusoma moto za ng'hondolo mbigalo,
nokulavila nhosa za ng'ombe na mbuzi.
16 Mwize mtegeleze mweye mose mumdumba Imulungu,
nowalongela gaja gayatendile muugima wangu.
17 Nimulilila kwa mulomo wangu,
na nhogolwa zikala mululimi lwangu.
18 Maza nifisile gehile mmoyo wangu,
Mndewa sambi yanitegeleze.
19 Lakini Imulungu kanihulika,
ona, kanitegeleza vinimpulile.
20 Imulungu yatogolwe,
kwavija handemele bule vinimpulile,
hebu kusegesa unogelo wake hawishaga kumwangu.