68
ZABULI YA 68
(Kwa kilanja, Zabuli ya Daudi.)
1 Imulungu kokwinuka,
iwanhu omwihila opwililika,
na iwanhu omulema omkimbila kutali.
2 Kamba yosi vidipwililika,
avo waleke wapwililike,
kamba uhota vuulumbuka mmoto,
vivo iwanhu wehile vonda walawanye kuulongozi wa Imulungu.
3 Lakini iwanhu wanogile wadeng'helele,
wadeng'he kuulongozi wa Imulungu,
wadeng'helele na kutowa ng'henze.
4 Mwimbileni Imulungu, dimbileni twaga jake.
Mwimbileni ayo yokwendelesha mawingu,
twaga jake Mndewa Imulungu,
deng'heleleni kuulongozi wake.
5 Tata wa iwana wakiwa,
na mgombela wagane,
Imulungu yokala hanhu hake hong'ala.
6 Imulungu kowatenda iwanhu okala waiyeka wawe na hanhu ha kukala.
Kowalekesa wafungwa na kowatenda wamwede,
ila iwanhu wehile okala mwiisi inyalile.
7 Imulungu vuukalile kuulongozi wa iwanhu wako,
vuukalile mmwanza ako kuluwala,
8 isi itigiswa na ulanga wita mvula,
kuulongozi wako gweye, Imulungu wa Sinai,
ona kuulongozi wako gweye Imulungu wa Izilaeli.
9 Kugala mvula mwingi, gweye Imulungu,
kuing'weza mazi isi yako inyalile.
10 Wanhu zako okala kuko gweye Imulungu,
kwa kunoga kwako kuwagwaa vinhu wakiwa.
11 Mndewa kolagiza,
watwanzi wengi wagala usenga.
12 Iwandewa na iwakalizi zao okimbila.
Watwanzi wetu okala ukae oigolela vibokigwe kung'hondo.
13 Hata wanhu owasa mmabumba ga ng'hondolo,
opata mabawa ga njiwa gagubikwe kwa shaba,
na mitipilo yake kwa zahabu ing'ala.
14 Imulungu yeli na udahi wose viyawapwililise iwandewa,
ikala kamba balafu ilagala kulugongo lwa Salimoni.
15 Gweye lugongo Iutali, lugongo lwa Bashani,
gweye lugongo luli na nhembeti nyingi, lugongo lwa Bashani.
16 Habali mokona migongo, gweye lugongo luli na nhembeti nyingi,
lugongo lwa Imulungu alo lumnogela heyo,
Mndewa Imulungu kokala kuko milele.
17 Mituka ya Imulungu ibanza maelufu longo,
maelufu kwa maelufu,
Mndewa keza kulawa Sinai mbaka hanhu hake hong'ala.
18 Vuukwelile uchanha kukwela hamoja na wafungwa,
kubokela nhunza kulawa kwa iwanhu,
hata kulawa kwa awo okulema gweye,
ili gweye Mndewa Imulungu ukale kuko.
19 Mndewa Imulungu yatogoligwe.
Siku mbaka siku kotupapila mizigo yetu,
Imulungu ayo yotukombola.
20 Imulungu wetu ayo Imulungu yotukombola,
kwa Mndewa Imulungu kuko wili ukombola wa iwanhu wa mwiisi.
21 Lakini Imulungu kogahonda mapala ga iwanhu omwihila,
mapala ga iwanhu ochola mnzila ya nzambi zao.
22 Mndewa, kalonga, “Nowabweza kulawa Bashani,
nowabweza kulawa mbahali,
23 ili ubojoge magulu gako mwiidamu ya iwanhu okwihila,
akuno milimi ya umbwa wako yopata hesa.”
24 Gweye Imulungu, mwanza wako wa mhumo oneka,
mwanza wa Imulungu, Mndewa Imulungu wangu,
olongoza hanhu hake hong'ala.
25 Tanhu weza wembaji, abaho watowa bango,
vivija na wali otowa ngoma ndodo.
26 Mtogoleni Imulungu kumting'hano mkulu,
mtogoleni Mndewa Imulungu kumting'hano wa Izilaeli.
27 Kabila dodo da Benjamini dowalongoza,
na iwatawala wa Yuda na bumbila jao,
abaho iwatawala wa Zabuloni na Nafutali.
28 Gweye Imulungu lagiza udahi wako,
gweye Imulungu tulagusile nguvu zako,
kamba vuutendile ako umwaka.
29 Mbuli ya ng'anda yako ako Yelusalemu,
iwandewa okugalila nhunza.
30 Mkomhokele munhu yokwihila yeli kamba mnyama yokala kudilolo,
heyo kamba bumbila da ng'ombe mbigalo hagati ya ng'ombe wana.
Wabojoge na wakugalile vihande va shaba.
Wapwililise iwanhu wa isi onogelwa na ng'hondo.
31 Wasenga okwiza kulawa Misili ogala nhunza,
Kushi omgalila Imulungu vinhu vao.
32 Mwimbileni Imulungu, mweye iwandewa wa isi yose,
mwimbileni nhogolwa Mndewa.
33 Mwimbileni nhogolwa heyo yakwelile kuulanga wa uchanha,
ona ulanga wa milele,
heyo koduma kwa sauti ng'hulu.
34 Longeni ukulu wa Imulungu,
heyo kotawala Izilaeli,
heyo kana udahi ako kuulanga.
35 Gweye Imulungu kodumbiza ako ihanhu hako hong'ala,
Imulungu wa Izilaeli ayo yowagwaa iwanhu zake nguvu na udahi.
Imulungu yatogolwe.