69
ZABULI YA 69
(Zabuli ya Daudi. Kwa kilanja, yatumie modeli ya lwila lwa Besa.)
1 Gweye Imulungu unikombole,
kwavija mazi ganivikila msingo.
2 Nodidimila mnhope,
hanhu sidaha kwima wima,
nivika mmazi mengi,
sika kulu dinigubika.
3 Nidonha kukulilila,
tundu melo jangu dinyala.
Meso gangu gavulala,
kwa kukubeta gweye Imulungu wangu.
4 Iwanhu onihila bila kilamuso wengi kubanza mvili zangu,
wengi onivamila kwa mbuli za uvizi.
Nolondigwa kubweza kinhu sikibile.
5 Gweye Imulungu, gweye kojuwa ubozi wangu,
nzambi zangu hazifisika kumwako.
6 Wose okutamanila gweye Mkulu Mndewa Imulungu,
sikuwagwe kinyala mbuli yangu.
Mndewa uli na udahi wose,
wose okuzahila gweye Imulungu wa Izilaeli,
sikuwagwe kinyala mbuli yangu.
7 Kwavija nisitamili kubezeligwa mbuli yako,
kinyala kigubika kihanga changu.
8 Niwa mgeni kwa ndugu zangu,
niwa mgeni kwa wanage mamangu mwenyego.
9 Kwavija unogelwa wangu kwa ng'anda yako osoma mgati mmwangu kamba moto,
maligo ga awo okuliga ganizila.
10 Nahalila na kufunga,
hewo onibezeli habali nhendile vivo.
11 Vinivalile viwalo va gunia kwa kuiyalala,
nikala kinhu cha kusekwa na iwanhu.
12 Waja okala mmulango onigeweza,
iwanhu wakoligwe otunga nyila mbuli yangu.
13 Lakini niye nokupula gweye Mndewa Imulungu.
Mkipindi kikunogeza, muunogelo wako hawishaga mkulu,
gweye Imulungu unidike kwa ukombola wako wa kweli.
14 Unitaze sikuunileke nididimile mnhope,
nilave mmakono ga awo onihila,
ndave kulawa mmazi mengi.
15 Sikuundeke nzoligwe na sika kulu,
hebu nididimile mmazi,
hebu nimezwe na ifa.
16 Gweye Mndewa Imulungu unidike,
kwavija unogelo wako hawishaga mkulu,
unihindukile kamba bazi jako vidili.
17 Sikuufise kihanga chako kwa msang'hanaji wako,
ulopole kunidika kwavija nammagazo.
18 Wize behi na unikombole,
unigombole kulawa kwa iwanhu onihila.
19 Gweye kotanga vindigigwa,
kotanga iwanhu viwongela kinyala na kunibezeli,
wose onihila gweye kowatanga.
20 Awo onibezeli wanibena nguvu na niye nifa umoyo,
nozahila imunhu wa kunyonela bazi,
lakini simpatile yoyose wa kunihoza.
21 Wanikila sumu mna ndiya yangu,
na ving'halile na ng'hilu wangwaa divai isasile.
22 Imeza itandigwe kuulongozi wa hewo iwe mtego,
na wagogwe mzinyimwilinyimwili zao.
23 Meso gao gageligwe ziza sikuwalole,
na migongo yao iveduke siku zose.
24 Uwakutulile ng'hasiliki yako,
kugevuzika kwako ng'hani kuwapate.
25 Kae yao iwe vihame,
sikuyakale munhu yoyose mvibanda vao.
26 Kwavija owadununza awo uwadununze,
na olonga mbuli ya usungu wa awo uwalumize.
27 Walihe gehile kwa gehile gao,
sikuuwaleke wailumbe muukombola wako.
28 Wasegeswe mkitabu cha wagima,
sikuwandikigwe mumsafa wa matwaga ga iwanhu otenda ganogile.
29 Lakini niye nogaya na nina usungu,
gweye Imulungu unikombole na unike goya.
30 Noditogola twaga da Imulungu kwa lwila,
na nomtogola kwa kumgwaa nhogolwa.
31 Mbuli ayo yomnogeza Mndewa Imulungu kubanza ng'ombe mbigalo,
kubanza ng'ombe mgima mgima.
32 Wakiwa ogona gago na kudeng'helela,
mweye mumzahila Imulungu mizoyo yenu ipate nguvu.
33 Mndewa Imulungu kowategeleza ngaengae,
hawasemwa wanhu zake wafungigwe mkifungo.
34 Ulanga na isi vimtogole,
bahali na vose vikalaga mumo.
35 Kwavija Imulungu kodikombola buga da Sayuni,
na kogazenga kabili mabuga ga Yuda.
Wanhu zake okala mumo na kutawala.
36 Wana wa iwasang'hanaji wa Imulungu odihazi,
na iwanhu wose odinogela twaga jake okala mumo.