72
ZABULI YA 72
(Zabuli ya Sulemani.)
1 Gweye Imulungu, mgwelele nzewele mndewa yataguse kwa haki yako,
mwana wa mndewa kwa haki yako.
2 Kowatagusa wanhu wako kwa haki,
iwanhu wako wakiwa kwa haki.
3 Vigongo vogala ukumweda kwa iwanhu,
vigongo vimeme matunda ga haki.
4 Kowagombela oneligwe mna iwanhu,
kowakombola wana wa ngaengae,
wahonde iwanhu owadununza wayagwe.
5 Kosigala kamba zuwa na mbalamwezi ulelo wose.
6 Kokuwa kamba mvula itowa mumgunda ulimigwe,
kamba luwaga lutowa mwiisi.
7 Kipindi chake wene haki omweda,
ukumweda kokuwa kuko mbaka mbalamwezi yahafa.
8 Kotawala kulawa bahali mbaka bahali,
na kulawa kuulwanda mbaka kuihelela isi.
9 Makabila ga kuluwala omfugamila,
na iwanhu omwihila ohumwa.
10 Wandewa wa Talishishi na iwandewa wa mhwani omgalila nhosa,
wandewa wa Sheba na Seba omgalila nhunza.
11 Wandewa wose omfugamila,
na iwanhu wa isi zose omsang'hanila.
12 Heyo komuhonya mkiwa yomulilila,
imunhu yoneligwe yelibule munhu wa kumtaza.
13 Kowonela bazi wakiwa na ngaengae,
na kowakombola welibule kinhu kulawa mkifo.
14 Kowakombola sikuwoneligwe na iwasede,
kwavija ugima wao ubanza kunoga kumwake.
15 Heyo yakale mgima,
na yabokele zahabu za Sheba,
wanhu wampulile kwa Imulungu siku zose,
na yamwede imisi yose.
16 Ndiya imeme mwiisi yose,
kunhembeti ya vigongo kumeme.
Kuwe na ndiya kamba muhulo wa Lebanoni,
wanhu mmabuga wamwede kamba mijani ya kubonde.
17 Twaga jake disigale milele,
na disigale kamba zuwa.
Iwanhu wa isi zose wamwede kubitila heyo,
na hewo wamkeme kamweda.
18 Mndewa Imulungu, Imulungu wa Izilaeli yatogolwe,
heyo yaiyeka yotenda mbuli za unzonza.
19 Twaga jake kulu ditogolwe milele,
isi yose imeme ukulu wake. Ona, Ona.
20 Uno awo uhelelo wa kupula kwa Daudi, imwana wa Yese.