73
ZABULI YA 73
(Zabuli ya Asafu.)
1 Kweli Imulungu kanoga kwa iwanhu wa Izilaeli,
kwa iwanhu waja mizoyo yao inoga.
2 Lakini kumwangu niye, migulu ikala yolonda kutelebuka,
mgulu wangu ulonda kutelebuka hanhu aho hanimile.
3 Kwavija niwonela migongo iwanhu oitapa,
vinyonile ukumweda kwa iwanhu wehile.
4 Hewo hawapata magazo mbaka ifa yao,
ng'huli zao zineneha na zina nguvu.
5 Hawagaya kamba iwanhu wayagwe,
na hawapata magazo kamba viwopata iwanhu wayagwe.
6 Avo kuitapa kwao kamba mkufu wao msingo,
kubezeli kamba kiwalo chao.
7 Gehile golawa mmizoyo yao ifile ganzi,
mipango yao ihile yolawa mmizoyo yao.
8 Obezeli na kulonga kwa usede,
oitapa na olonda kuwadununza wayagwe.
9 Milomo yao yolonga gehile hata kwa ulanga,
na olonga kwa kuitapa kwa wanhu wayagwe.
10 Avo iwanhu zao owahindukila,
na hawona kilozo chochose.
11 Olonga, “Imulungu kotangaze?
Vino heyo yeli Uchanha Ng'hani kotanga kinhu?”
12 Vino, vivo weli wene nzambi,
hawagelegeza kinhu siku zose okwengeza utajili.
13 Nigaya bule kuwika moyo wangu unogile,
na kunawa makono gangu sikuniwe na kitala.
14 Imisi yose nigazwa,
nitagusigwa kila imitondo.
15 Maza nilongile, “Nolonga vino,”
nahawahinduke wanago.
16 Vinigezile kugajuwa gose,
gakala ngaga kumwangu kugajuwa,
17 mbaka viningile hanhu hong'ala ha Imulungu,
aho nijuwa uhelelo wao.
18 Kweli koweka hanhu hana lungwi,
kowabwanha hasi kwa ubananzi.
19 Lola viwobanangwa himahima,
osegeswa kwa bwembwe.
20 Kamba nzozi munhu viyolamuka,
vivo vuwinuka gweye Mndewa,
kowasegesa kamba nzozi.
21 Moyo wangu vuugeligwe lusikisiki,
na loho yangu viigeligwe usungu,
22 nikala mbozi na sijuwile kinhu,
nikala kamba ng'onyo kumwako.
23 Lakini nahamoja na gweye siku zose,
kunigoga mkono wangu wa ukudila.
24 Konilongoza kwa gaja goulonda,
abaho konibokela kwa ukulu wako.
25 Nani iyagwe inilinayo kuulanga ila gweye?
Mwiisi haduhu kinhu kinisulukila kubanza gweye.
26 Lukuli lwangu na moyo wangu vodaha kulemelwa,
ila Imulungu ayo nguvu ya moyo wangu na fungu jangu milele.
27 Wose okala kutali na gweye obanangwa,
kowabananga wose hawakutamanila gweye.
28 Kumwangu niye kukala behi na Imulungu kinhu kinogile,
nimtenda Mkulu Mndewa Imulungu kimbililo jangu,
nolonga gose gausang'hane.