74
ZABULI YA 74
(Lwila lwa Asafu.)
1 Gweye Imulungu habali kutulema milele?
Habali ng'hasiliki yako yokwaka kwa ng'hondolo zako?
2 Kumbuka iwanhu waugulile tangu umwaka,
kumbuka kabila da uhazi wako awo kuwagombola,
kumbuka lugongo lwa Sayuni ako kuukalile.
3 Hinduka uchole kuvihame vino milele,
unanzi uno wa ihanhu hako hong'ala ugaligwe na wanhu okwihila.
4 Iwanhu okwihila wabuma kwa mhumo aho ihanhu hako hong'ala hauiting'hane na siye,
okwika bendela zao kamba kilaguso cha mhumo.
5 Watenda kamba iwanhu osang'hanila mishoka,
okanha mibiki.
6 Wabena mbao zihambigwe goya,
kwa mishoka na nyundo.
7 Wahasoma moto hanhu hong'ala mbaka hasi,
wahagela dikwe hanhu hodikala twaga jako.
8 Walonga mmizoyo yao, “Towahonda kabisa!”
Wahasoma moto kila hanhu hotuiting'hana kukutambikila.
9 Hatugweleligwe kilaguso cha unzonza,
haduhu watula ndagu wasigale,
haduhu munhu vitwili yojuwa mbuli ino yokwisha lini.
10 Gweye Imulungu mdetaji kokubezeli mbaka lini?
Vino iwanhu okwihila odiliga twaga jako milele?
11 Habali kougomesa mkono wako wa ukudila wa nguvu?
Golosa mkono wako uwabanange.
12 Lakini gweye Imulungu kwa Mndewa wangu tangu umwaka,
gweye kogala ukombola mwiisi.
13 Gweye ayo uigolile bahali kwa nguvu zako,
kugatula mapala ga iming'onyo mikulu ili mgamazi.
14 Gweye ayo utulile pala da Lewiasani,
na kumulava kamba ndiya ya viumbe va kuluwala.
15 Gweye ayo ufungule mbwibwi na vizanda,
vizanda vikalile vokilima siku zose kuvinyaza.
16 Imisi yako na vivija ikilo yako,
gweye kwika zuwa na mbalamwezi.
17 Gweye ayo wikile imbaka ya isi yose,
kutenda msimu wa zuwa kali na masika.
18 Kumbuka mdetaji viyakubezeli gweye Mndewa Imulungu,
wanhu viwadiligile twaga jako.
19 Sikuugale ugima wa njiwa wako kwa iming'onyo ya kumuhulo,
sikuuusemwe ugima wa iwanhu wako ogaya milele.
20 Dikumbuke lagano jako,
hanhu ha ziza ha isi hamema iwanhu ogala ndwagi.
21 Sikuutogole iwanhu oneligwe wabwele kuchugu kwa kinyala,
wakiwa na welibule kinhu waditogole twaga jako.
22 Inuka gweye Imulungu uigombele,
kumbuka iwanhu wabozi viwokubezeli imisi yose.
23 Sikuuisemwe kuguta kwa iwanhu okulema gweye,
kubuma kwa iwanhu okwihila kila siku.