78
ZABULI YA 78
(Lwila lwa Asafu.)
1 Mweye wanhu zangu, hulikeni mafundizo gangu,
tegelezeni mbuli za mulomo wangu.
2 Nogubula mulomo wangu kwa mzungu,
nolonga ulonzi ufisigwe kulawa umwaka,
3 gaja gatuhulike na kugatanga,
gaja gatulongelwe na iwahenga zetu.
4 Hatugafisa kwa wanao,
towalongela iwanhu wa ulelo ukwiza,
sang'hano ng'hulu za Mndewa Imulungu,
udahi wake na unzonza yautendile.
5 Kalava amuli kwa Yakobo,
na keka malagizo mwiisi ya Izilaeli,
na kawalagiza iwahenga zetu wawafunze wanao,
6 ili iwanhu wa ulelo ukwiza wagajuwe,
hamoja na iwana onda waleligwe,
na hewo vivija kwa kipindi chao wawalongele wanao.
7 Aho okwika tamanilo jao kwa Imulungu,
na hawaisemwa mbuli zake ng'hulu,
lakini ogagoga malagizo gake.
8 Na sikuwaigale na iwahenga zao,
wakalile ulelo wa iwanhu wadulu,
na walema kutegeleza,
wanhu hawatamaniligwa kumwake,
awo loho zao hazimgogile Imulungu.
9 Kamba iwanhu wa Efulaimu hamoja wagoga upinde,
wakimbila siku da ing'hondo.
10 Hawadigogile lagano da Imulungu,
na walema kukala kwa malagizo gake.
11 Waisemwa gaja gayawatendele,
unzonza yaulaguse kumwao.
12 Katenda unzonza mgameso ga iwahenga zao,
ako Soani mwiisi ya Misili.
13 Kaigola bahali na kawalongoza mbaka wabita,
kagatenda mazi gema kamba kisugulu.
14 Kawalongoza kwa wingu imisi,
na kwa mulenge kulawa mmoto kilo kigima.
15 Katula mibwe kuluwala,
kawagwaa mazi mengi kamba bahali,
16 katenda mbwibwi kulawa mdibwe,
kagatenda mazi gakilime kamba lwanda.
17 Lakini wagendelela kumtendela nzambi,
ako kuluwala wamulema ayo yeli Uchanha Ng'hani.
18 Wamgeza Imulungu giladi,
walonda ndiya waisulukile wenyego.
19 Wamdeta Imulungu, walonga,
“Vino Imulungu kodaha kutanda meza ya ndiya kuluwala?
20 Ona, katowa dibwe na mazi galawa,
mbwibwi zilava mazi mengi.
Lakini heyo vivija kodaha kutugwaa ndiya,
hebu kutugwaa nyama?”
21 Mndewa Imulungu viyawahulike kagevuzika ng'hani,
moto wake ukala kwa ulelo wa Yakobo,
na ng'hasiliki yake iwakila wanhu wa Izilaeli,
22 kwavija hawamtamanile Imulungu,
na hawatogole kamba yahadahile kuwakombola.
23 Avo, kalagiza ulanga uli uchanha,
na kavugula milango ya kuulanga,
24 kawalagazila mana kamba ndiya,
kawagwaa ndiya ya kuulanga.
25 Wanhu waja ndiya ya wasenga wa kuulanga,
kawagwaa ndiya kamba vuwadahile kuja.
26 Kagala beho da umwambu wa kudilawila zuwa kulawa kuulanga,
na kwa udahi wake kadilongoza beho da mwambu wa kusini.
27 Kawalagazila nyama kamba timbwisi,
ndege oguluka kamba msanga wa mwhani.
28 Kawatenda wagwe mng'hambi yao,
na wazunguluka vibanda vao vose.
29 Wanhu waja na kusigasa,
kwavija kawagwaa kija kiwasulukile.
30 Wang'hali hawana mambukiza kuja acho kiwasulukile,
ndiya viikalile ing'hali mmulomo,
31 Imulungu kawagevuzikila,
kawakoma awo wakalile na nguvu hagati yao,
kawabwanha iwabwanga wa Izilaeli.
32 Hamoja ago gose galawila,
hewo wagendelela kutenda nzambi,
na hawatamanile unzonza wake.
33 Avo kazitenda siku zao zilawanye kamba mhumuzi,
na miyaka yao ishila mkudumba.
34 Viyawakomile wamzahila,
waleka gehile gao na wambwelela Imulungu kabili kwa mizoyo yao yose.
35 Wakumbuka kamba Imulungu kalala dibwe jao,
Imulungu yeli Uchanha Ng'hani ayo mkombola wao.
36 Lakini wamvizila kwa milomo yao,
walonga uvizi kwa milimi yao,
37 mizoyo yao haimgogile heyo,
na hawatamanilwe mdilagano jake.
38 Hata ivo heyo kakala na bazi,
kagela kumgongo gehile gao na hawabanange bule.
Miyanza mingi kaikimila ng'hasiliki yake,
na haibwinhile ng'hasiliki yake yose.
39 Kakumbuka kamba hewo wakala wanhu tu,
na kamba beho dibita na kulawanya.
40 Miyanza mingi wamulema kuluwala,
na wamgela usungu kudibawe.
41 Wamgeza Imulungu kabili na kabili,
na wamgevuza ayo Yang'alile wa Izilaeli.
42 Waisemwa nguvu zake,
siku viyawakombole kulawa kwa awo wawehile,
43 siku ayo viyatendile vilaguso vake ako Misili,
na unzonza wake ako Soani.
44 Kagalusa vizanda vao viwa damu,
kawatenda sikuwadahe kung'wa mazi gao.
45 Kawagalila mikonzi iwagaze,
na mibula iwanange.
46 Kailava ndiya yao inangigwe na mbalangulu,
na migunda yao inangigwe na nzige.
47 Kabananga mizabibu yao kwa mvula ya mabwe,
na mikuyu yao kwa beho kali.
48 Kawatowa ng'ombe wao kwa mvula ya mabwe,
kaitowa fugo yao kwa ng'huwa.
49 Kawakutulila ng'hasiliki yake,
na ludoko na magazo na madununzo,
kwa bumbila da wasenga wa kuulanga wabananzi.
50 Kaitendela nzila ng'hasiliki yake,
hawahonyeke na ifa,
ila kawakoma kwa mitamu.
51 Kawakoboza iwana chaudele wose wa Misili,
wana chaudele weli mkibanda cha Hamu.
52 Lakini kawalava iwanhu zake kamba fugo,
kawalongoza kamba ng'hondolo kubitila kuluwala.
53 Kawalongoza goya na hawadumbile,
ila bahali iwameza iwanhu owehila.
54 Kawagala mbaka kuna imbaka ya isi yake ing'alile,
ako kuna iisi ya kuvigongo iyasolile kwa nguvu zake.
55 Kawawinga iwanhu wa isi ziyagwe kuulongozi wao,
na kaigola isi yao kamba uhazi,
kageka makabila ga Izilaeli mvibanda vao.
56 Lakini hewo wamgeza Imulungu,
na wamulema ayo yeli Uchanha Ng'hani,
na hawazigogile amuli zake.
57 Wahinduka kuyagwe na hawatamaniligwe kamba iwahenga zao,
hawatamaniligwe kamba upinde wenye kasolo.
58 Wamgevuza Imulungu kwa kuzenga hanhu ha kutambikila imilungu kuvigongo,
na wamgela migongo kwa kutenda vinyago.
59 Imulungu viyawahulike kagevuzika ng'hani,
kawalema ng'hani Waizilaeli.
60 Kadileka dihema ding'alile dikalile ako Shilo,
aho haakalile hagati ya iwanhu.
61 Katogola disanduku da lagano disoligwe,
ukulu wake kaugala mmakono ga awo omwihila.
62 Kawaleka iwanhu zake wakomigwe kwa sime,
kawagevuzikila ng'hani iwanhu wa uhazi wake.
63 Moto uwasakaza iwabwanga wao,
iwandele wao hawembiligwe nyila za zengele.
64 Iwalava nhosa wao wakomigwa kwa sime,
na ivizuka hawadahile kulila.
65 Abaho Mndewa kalamuka kamba munhu yawasile utulo,
kamba munhu yoguta mbuli ya kung'wa ugimbi.
66 Kawatowa na kawahuma iwanhu omwihila,
na kawagela mkinyala cha milele.
67 Abaho kadilema hema da Yusufu,
hadisagule kabila da Efulaimu,
68 lakini kadisagula kabila da Yuda,
lugongo lwa Sayuni, alo kalunogela.
69 Kazenga hanhu hake hong'ala kamba ulanga,
kamba isi iyailumbile ikale milele.
70 Kamsagula Daudi msang'hanaji wake,
na kamulava kulawa mmabumba ga ng'hondolo,
71 kulawa kususila ng'hondolo kamgala yawe msusilaji wa iwanhu wa Yakobo,
na Izilaeli wanhu wake.
72 Na Daudi kawasusila kwa moyo unogile,
kwa mikono ya ufundi kawalongoza.