79
ZABULI YA 79
(Zabuli ya Asafu.)
1 Go Imulungu, iwanhu wa isi ziyagwe waivamila isi ya uhazi wako,
waifitiza ng'anda yako ing'ala,
waditenda buga da Yelusalemu diwe vihame.
2 Walava mitufi ya iwasang'hanaji wako iwe ndiya ya ndege wa kuulanga,
na ng'huli za iwanhu wako ong'ala kwa ming'onyo ya kumuhulo.
3 Weta damu yao kamba mazi kuzunguluka buga jose da Yelusalemu,
na haduhu munhu yoyose wa kuwazika.
4 Tuwa kinhu cha kinyala kwa iwanhu wa behi yetu,
iwanhu otuzunguluka otuseka kwa bezi na ugewezi.
5 Mbaka lini gweye Mndewa Imulungu?
Vino gweye kogevuzika milele?
Wivu wako okwaka kamba moto mbaka lini?
6 Ita ng'hasiliki yako kwa iwanhu wa isi hawakutogola,
mbuli ya undewa wa awo hawadikema twaga jako,
7 na kwavija wawananga wanhu wa ulelo wa Yakobo,
na kuinanga isi ya ukazi wao.
8 Sikuuzikumbuke nzambi za wahenga zetu,
bazi jako ditwizile hima kwavija togaya ng'hani.
9 Imulungu mkombola wetu ututaze,
mbuli ya ukulu wa twaga jako,
tukombole na uzigele kumgongo nzambi zetu mbuli ya twaga jako.
10 Habali iwanhu wa isi ziyagwe walonge,
“Ka kwahi Imulungu wenu?”
Mgameso getu walagusile iwanhu wa isi ziyagwe,
kamba gweye koliha damu itigwe ya iwasang'hanaji wako.
11 Kililo cha usungu cha iwafungwa kivike kuulongozi wako,
kwa nguvu za mkono wako wakalize waja watagusigwe kufa.
12 Wabwezele iwanhu wa behi yetu miyanza saba,
mbuli ya maligo gawakuligile gweye Mndewa.
13 Siye wanhu wako, ng'hondolo wa hanhu ha kudimila,
tokushukulu milele, kulawa ulelo mbaka ulelo,
na tolonga ng'hogolwa zako.