80
ZABULI YA 80
(Zabuli ya Asafu. Kwa kilanja, yatumie modeli ya lwila lwa Besa.)
1 Gweye msusilaji wa Izilaeli tutegeleze,
gweye umulongoza Yusufu kamba fugo,
gweye ukalaga mkigoda cha ukulu hagati ya viumbe wa kuulanga, umwemwese.
2 Kuulongozi wa Efulaimu, Benjamini na Manase.
Inula nguvu zako, wize utukombole.
3 Gweye Imulungu utubweze,
utumwemwesele kihanga chako, ili tukomboligwe.
4 Gweye Mndewa Imulungu uli na nguvu zose,
mbaka lini ng'hasiliki yako yokwaka na kulava yosi,
kwa kupula kwa iwanhu zako?
5 Kuwadima gate da mahozi,
kuwatenda wang'we mahozi bakuli dimemile.
6 Kuwatenda iwanhu wa isi zituzunguluke wagombe mbuli ya isi yetu,
na iwanhu otwihila otuseka.
7 Gweye Imulungu uli na Udahi wose,
utubweze na tumwemwesele kihanga chako,
ili siye tukomboligwe.
8 Kugala mzabibu kulawa Misili,
kowawinga iwanhu wa isi ziyagwe,
kuuhanda mwiisi yao.
9 Kuuhalilila ili ukule,
wota na mizizi yake yenela mwiisi yao yose.
10 Vigongo vigubikwa kwa sisila jake,
matambi gake gagubika mielezi mikulu.
11 Matambi gake genela mbaka mmbahali,
nzukila zake mbaka kulwanda.
12 Mbona kubomola senyenge zake,
ili iwanhu obita behi wabawe zabibu zake?
13 Nguluwe luwala ounanga,
na wanyama wa kubonde odimiligwa mumo.
14 Tubwelele gweye Imulungu uli na Udahi wose.
Lola hasi kulawa kuulanga wone.
Ukalize mzabibu uno,
15 kigongi cha mzabibu chuuhandile kwa mkono wako wa ukudila,
mwana yumulelile mbuli yako mwenyego.
16 Mzabibu wako ukanhigwa na usomigwa moto,
kwa kuwakomhokela wanhu wako obanangwa.
17 Mkono wako ukale kwa munhu yokala mkono wako wa ukudila,
mwana wa munhu yumulelile mbuli yako mwenyego.
18 Abaho hatukuleka kabili,
utubwezele loho zetu na todikema twaga jako.
19 Gweye Mndewa Imulungu uli na Udahi wose,
utubweze na tumwemwesele kihanga chako,
ili siye tukomboligwe.